میرا کے بیان سے سوشل میڈیا  صارفین حیران

?️ 22 اگست 2021

کراچی (سچ خبریں)لالی ووڈ کی مقبول ترین اداکارہ میرا اکثر نے ایک بار پھر مینارِ پاکستان واقعہ پر ایسا بیان دیا ہے کہ سوشل میڈیا صارفین حیران رہ گئے ہیں۔وہ اپنے مختلف بیانات کی وجہ سے خبروں کی زینت بنتی رہتی ہیں یا یہ کہنا غلط نہیں ہوگا کہ اُن کے پاس سُرخیوں میں آنے کا ایک ٹیلنٹ بھی ہے۔

اب میرا مینارِ پاکستان واقعہ پر جہاں عوام، سماجی کارکن اور صحافی برداری اپنی آواز بُلند کرتی نظر آرہی ہے تو وہیں شوبز ستارے بھی کسی سے پیچھے نہیں ہیں۔فنکار برادری کی جانب سے سوشل میڈیا کے مختلف پلیٹ فارمز پر مینارِ پاکستان واقعہ کی متاثرہ خاتون ٹک ٹاکر کو انصاف دینے کی اپیل کی جارہی ہے۔

اب سوشل میڈیا پر اداکارہ میرا کا ایک بیان تیزی سے وائرل ہورہا ہے جسے سُننے کے بعد صارفین دنگ رہ گئے ہیں۔سوشل میڈیا پر وائرل ہونے والی ویڈیو میں اداکارہ میرا مردوں کو ایک حیران کُن مشورہ دیتی ہوئی نظر آرہی ہیں۔اداکارہ میرا نے اپنے بیان میں مردوں سے مخاطب ہوتے کہا کہ ’لڑکیوں کی عزت کیا کریں، احترام، تہذیب اور اخلاق۔‘

اُنہوں نے کہا کہ ’لڑکیوں کو اتنی عزت دیں کہ وہ خود ہی آپ کو چھیڑنے پر مجبور ہوجائیں۔میرا کے اس بیان پر سوشل میڈیا صارفین کی جانب سے مختلف تبصروں کا سلسلہ شروع ہوگیا ہے، صارفین کا کہنا ہے کہ میرا جان بوجھ کر ایسے بیان دیتی ہیں تاکہ وہ خبروں میں آئیں۔

لاہور کے گریٹر اقبال پارک میں یومِ آزادی کے موقع پر خاتون ٹک ٹاکر سے دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔سیکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیے جبکہ پولیس واقعے سے بے خبر رہی۔فوٹیجز سوشل میڈیا پر وائرل ہونے پر پولیس نے 400 افراد کے خلاف مقدمہ درج کر لیا جبکہ وزیر اعلیٰ پنجاب عثمان بزدار نے ملزمان کی فوری گرفتاری کا حکم دیا۔