اگر شادی ہو چکی ہوتی تو تین چار بچوں کا باپ ہوتا،عثمان خالد بٹ

?️ 4 اپریل 2024

کراچی: (سچ خبریں) مقبول اداکار عثمان خالد بٹ نے کہا ہے کہ وہ کسی سے تعلقات میں رہ چکے ہیں اور اگر ان کی شادی ہوچکی ہوتی تو اب تک وہ تین سے چار بچوں کے باپ ہوتے۔

حال ہی میں وی او اے اردو کو دیے گئے انٹرویو میں اداکار نے یہ انکشاف بھی کیا کہ وہ اپنے مقبول ڈرامے کالا ڈوریا میں کام کرنے کے بعد ذہنی مسائل کا شکار ہوگئے تھے، جس وجہ سے وہ کچھ عرصے سے اسکرین سے دور ہیں۔

اداکار نے یہ واضح نہیں کیا کہ وہ کس وجہ سے کالا ڈوریا کے بعد ذہنی مسائل کا شکار ہوئے، تاہم انہوں نے بتایا کہ مذکورہ ڈراما بظاہر آسان تھا لیکن درحقیقت ان سمیت دیگر افراد کو بھی مشکلات پیش آئیں۔

فلموں میں کام کرنے کے سوال پر انہوں نے کہا کہ انہوں نے اپنی فلم بالو ماہی کے بعد ہی فیصلہ کرلیا تھا کہ وہ اب اس وقت ہی فلم میں کام کریں گے جب انہیں منفرد کردار کی پیش کش ہوگی، اس لیے وہ زیادہ فلمیں نہیں کرتے۔

ساتھ ہی عثمان خالد بٹ کا کہنا تھا کہ فلم بہت بڑا رسک ہوتا ہے، اس میں ان ہی اداکاروں کو لیا جاتا ہے جو اسکرین پر زیادہ نظر آ رہے ہوتے ہیں اور پھر فلموں میں فیورٹزم بھی چلتا ہے۔

ماہرہ خان کے ساتھ فلم سپر اسٹار میں آئٹم سانگ کرنے کے سوال پر خالد عثمان بٹ کا کہنا تھا کہ انہوں نے اس لیے اداکارہ کے ساتھ ڈانس پرفارمنس کی، کیوں کہ انہیں بچپن سے ہی ڈانسر بننے کا شوق تھا اور یہ کہ وہ پہلے بھی ماہرہ خان کے ساتھ اسٹیج پر پرفارمنس کر چکے تھے۔

اداکار کا کہنا تھا کہ وہ نہ صرف اسکرپٹ لکھتے ہیں بلکہ انہوں نے اسٹیج ڈراموں کی ہدایات بھی دی ہیں جب کہ وہ بطور میک اپ آرٹسٹ بھی کام کر چکے ہیں اور مستقبل میں ان کا فلموں اور ڈراموں کی ہدایت کاری کا بھی ارادہ ہے۔

شادی سے متعلق پوچھے گئے سوال پر انہوں نے کہا کہ انہیں اچھے شریک حیات کی تلاش ہے، جیسے ہی اچھا جیون ساتھی مل جائے گا وہ رشتہ ازدواج میں بندھ جائیں گے۔

عثمان خالد بٹ کا کہنا تھا کہ ان کے خاندان کی روایات ایسی نہیں ہیں کہ وہ انہیں شادی کے لیے دباؤ ڈالیں، وہ بہتر ساتھی مل جانے پر ہی شادی کریں گے۔

ساتھ ہی انہوں نے کہا کہ وہ اچھے شریک حیات کو تلاش کر رہے ہیں اور یہ کہ ماضی میں وہ ایسے تجربات کر بھی چکے ہیں اور اس وقت اگر ان کی شادی ہوچکی ہوتی تو اس وقت وہ تین سے چار بچوں کے باپ ہوتے۔