پی ٹی آئی پر پابندی لگائی گئی تو کیا ہوگا؟؛ بیرسٹر سیف کی زبانی

?️ 24 جولائی 2024

سچ خبریں: خیبرپختونخوا کے مشیر اطلاعات بیرسٹر محمد علی سیف نے کہا ہے کہ اگر وفاقی کابینہ نے آج پاکستان تحریک انصاف پر پابندی کا بے اصولی فیصلہ کیا تو اگلی باری مسلم لیگ (ن) اور پھر دوسروں کی ہوگی۔

رپورٹ کے مطابق، بیرسٹر محمد علی سیف نے ایک بیان میں کہا کہ علی بابا اور چالیس چور پی ٹی آئی کی مقبولیت برداشت نہیں کر پا رہے ہیں۔

انہوں نے کہا کہ مینڈیٹ چور حکومت پی ٹی آئی پر لاکھ پابندیاں لگائے، لیکن ہم ملک چھوڑنے یا ڈیل کرنے والوں میں سے نہیں ہیں۔

یہ بھی پڑھیں: لاہور میں تاریخی جلسہ کریں گے‘ مینڈیٹ ان کے حلق سے اُگلوائیں گے، شیر افضل مروت

انہوں نے کہا کہ پی ٹی آئی ایک نظریے کا نام ہے اور نظریہ کبھی ختم نہیں ہوتا۔ تاریخ میں کبھی بھی کسی سیاسی جماعت یا تحریک کا خاتمہ پابندیوں سے نہیں ہوا۔

انہوں نے مزید کہا کہ پی ٹی آئی پر پابندی لگانے کا فیصلہ جعلی حکومت کے سب سے بڑے احمقانہ فیصلوں میں شمار ہوگا۔

بیرسٹر سیف کا کہنا تھا کہ پی ٹی آئی کے خلاف ہر قسم کی سازشوں اور غیر آئینی و غیر قانونی اقدامات کے باوجود ہماری مقبولیت میں مسلسل اضافہ ہو رہا ہے۔

انہوں نے کہا کہ ہم اسی ملک میں رہ کر تمام مظالم اور غیر آئینی اقدامات کا مقابلہ کریں گے، اور ہماری جنگ آئین کی بالادستی اور ملک سے کرپٹ سیاسی ٹولے کے خلاف جاری رہے گی۔

انہوں نے کہا کہ سیاسی رہنماؤں، کارکنوں اور میڈیا پر پابندی لگانا مسلم لیگ (ن) کا پرانا وطیرہ ہے۔

پی ٹی آئی پر پابندی لگا کر جعلی حکومت اپنے ہی پاؤں پر کلہاڑی مار رہی ہے۔

مزید پڑھیں: کیا حکومت پی ٹی آئی پر پابندی لگانے کا فیصلہ واپس لے لے گی؟

بیرسٹر سیف نے مزید کہا کہ شریف خاندان عوام کو مشکل حالات میں چھوڑ کر دو بار ملک سے بھاگ چکا ہے، جبکہ پی ٹی آئی نے گزشتہ 20 ماہ سے پابندیوں اور مشکلات کا ڈٹ کر مقابلہ کیا ہے۔