کیا حکومت پی ٹی آئی پر پابندی لگانے کا فیصلہ واپس لے لے گی؟

?️ 17 جولائی 2024

سچ خبریں: تحریک انصاف پر پابندی کے حکومتی اعلان کے بعد اب یہ معاملہ پارلیمنٹ میں مشاورت کے مرحلے تک پہنچ گیا ہے۔

حکومت کی جانب سے پابندی کے اعلان اور سپریم کورٹ جانے کے دعوؤں کے بعد، اب معاملہ پارلیمنٹ میں لے جانے اور اتحادیوں سے مشورہ کرنے تک پہنچ گیا ہے۔ اس کے بعد مسلم لیگ (ن) کے ایک سینئر رہنما نے کہا ہے کہ سیاسی جماعت پر پابندی نہیں لگنی چاہیے۔

یہ بھی پڑھیں: پی ٹی آئی پر پابندی کے اغراض و مقاصد

پیر کے روز وزیر اطلاعات عطا تارڑ نے پریس کانفرنس میں اعلان کیا تھا کہ حکومت تحریک انصاف پر پابندی کے لیے کیس دائر کرے گی اور پی ٹی آئی پر پابندی لگانے جا رہی ہے۔ طلال چوہدری نے مزید کہا کہ ریفرنس سپریم کورٹ بھیج دیا گیا ہے اور اب عدالت فیصلہ کرے گی۔ لیکن پھر اسحاق ڈار نے کہا کہ فیصلے کو پہلے لیڈرشپ دیکھے گی، پھر اتحادیوں سے مشورہ ہوگا، اور آئین و قانون کے تحت فیصلہ کیا جائے گا۔

وفاقی وزیر خواجہ آصف کا کہنا تھا کہ فیصلہ پارلیمنٹ میں جائے گا اور ہر جماعت کی رضامندی کے بعد ہی کوئی قدم اٹھایا جائے گا۔

دوسری جانب، خرم دستگیر نے کہا کہ پی ٹی آئی کی تمام تر فاشزم کے باوجود سیاسی جماعت پر پابندی نہیں لگنی چاہیے۔ انہوں نے کہا کہ حکومت نے فیصلہ ضرور کیا ہے لیکن ہم سیاسی جماعت کا مقابلہ سیاست کے ذریعے کریں گے۔

جاوید لطیف کا کہنا تھا کہ کسی سیاسی جماعت پر پابندی نہیں لگنی چاہیے، لیکن اگر کوئی ملکی مفادات کے خلاف کام کرے گا تو اس پر پابندی لگانی چاہیے اور اسے قانون کے کٹہرے میں لانا چاہیے۔

مزید پڑھیں: عمران خان کا ’مینڈیٹ چوروں‘ کیخلاف آرٹیکل 6 کے تحت مقدمہ چلانے کا مطالبہ

خیال رہے کہ وفاقی حکومت نے تحریک انصاف پر پابندی لگانے کا فیصلہ کیا ہے اور اعلان کیا ہے کہ سابق صدر عارف علوی، بانی پی ٹی آئی عمران خان اور سابق ڈپٹی اسپیکر قاسم سوری کے خلاف آرٹیکل 6 کے تحت مقدمہ چلایا جائے گا۔ ان تینوں افراد کے خلاف وفاقی کابینہ کی منظوری کے بعد یہ ریفرنس سپریم کورٹ کو بھیجا جائے گا۔