پی ٹی آئی اور جے یو آئی کے درمیان مذاکرات

1 جولائی 2024

سچ خبریں: پاکستان تحریک انصاف نے جے یو آئی کے ساتھ مذاکرات کے لیے ایک پانچ رکنی ٹیم تشکیل دے کر اس کے اراکین کے نام جمعیت علمائے اسلام (جے یو آئی) ف کو بھیج دیے۔

ذرائع کے مطابق پی ٹی آئی کی جانب سے جے یو آئی سے مذاکرات کے لیے بنائی گئی ٹیم میں اسد قیصر، بیرسٹر گوہر، اور رؤف حسن شامل ہیں۔

ذرائع کا کہنا ہے کہ پی ٹی آئی کی مذاکراتی ٹیم میں شبلی فراز اور عمر ایوب بھی شامل ہوں گے۔

یہ بھی پڑھیں: حکومت نے مذاکرات کی پیشکش کیوں کی ہے؟؛علی محمد خان کی زبانی

یاد رہے کہ اس سے قبل پی ٹی آئی سے اتحاد پر مولانا فضل الرحمان کا کہنا تھا کہ ہم بصد احترام سمجھتے ہیں کہ پی ٹی آئی قیادت میں یکسوئی کی کمی ہے، پی ٹی آئی قائد کی جانب سے وفود بات تو کرتے ہیں مگر ابھی تک کوئی مذاکراتی کمیٹی تشکیل نہیں دی گئی۔

جے یو آئی کی مرکزی مجلس شوریٰ کے اجلاس کے بعد میڈیا سے بات کرتے ہوئے مولانا فضل الرحمان نے کہا کہ سنی اتحاد کونسل کے سربراہ کے بیانات جے یو آئی کے ساتھ نہ چلنے کی بات کر رہے ہیں، پی ٹی آئی اور سنی اتحاد کونسل ابہام کو دور کریں، ہم مشترکہ اہداف اور مذاکرات سے انکار نہیں کرتے۔

مزید پڑھیں: کیا حکومت اور پی ٹی آئی میں مذاکرات ہو سکتے ہیں؟

مولانا فضل الرحمان کا کہنا تھا کہ پی ٹی آئی کے وفود نے بھی رابطے کیے ہیں، مجلس شوریٰ نے اس کا بھی جائزہ لیا، پی ٹی آئی کو مذاکرات میں خوش آمدید کہتے ہیں، پی ٹی آئی پر واضح کردیا تھا کہ مناسب ماحول کا قیام ضروری ہے، ہم نے جن مثبت رویوں کا آغاز کیا، اس پر قائم ہیں۔