بیرسٹر گوہر کی خواجہ آصف پر تنقید

2 اگست 2024

سچ خبریں: پاکستان تحریک انصاف کے چیئرمین بیرسٹر گوہر نے کہا ہے کہ ہم نے کسی کے بارے میں نازیبا الفاظ استعمال نہیں کیے،اگر کسی موقع پر غلط الفاظ استعمال ہوئے ہیں تو انہیں درگزر کریں۔

وزیر دفاع خواجہ آصف کے بیان پر ردعمل دیتے ہوئے بیرسٹر گوہر نے کہا کہ خواجہ آصف ہمیشہ کہتے ہیں کہ ہمیں پارلیمنٹ میں رکھو، جبکہ ان کے الفاظ بیہودہ ہوتے ہیں۔

یہ بھی پڑھیں: خواجہ آصف کا بانی پی ٹی آئی کو عجیب مشورہ

انہوں نے کہا کہ یہ تاثر ختم ہونا چاہیے کہ ایک ادارہ یا سربراہ سسٹم پر حاوی ہو۔ تمام ریاستی ادارے مل کر کام کریں اور ایک دوسرے پر حاوی نہ ہوں۔

بیرسٹر گوہر کا کہنا تھا کہ جہاں تک الفاظ کی بات ہے، ہم نے کسی کو جنگل کا بادشاہ نہیں کہا۔ عوام کے حقوق کا محافظ ایک شخص نہیں ہو سکتا، یہ آئین کی خلاف ورزی ہے۔

جب ان سے سوال کیا گیا کہ فوج کا سیاسی کردار آئین میں درج نہیں تو پھر آپ کیوں ان کو مذاکرات کے ذریعے سیاسی عمل میں شامل کر رہے ہیں؟ تو انہوں نے جواب دیا کہ مداخلت اور چیز ہے، جبکہ خلیج کم کرنا اور اعتماد بحال کرنا الگ بات ہے۔ ملکی استحکام و مضبوطی کے لیے افواج پاکستان ضروری ہیں۔

بیرسٹر گوہر کا کہنا تھا کہ ہماری کسی شخص سے ذاتی لڑائی نہیں ہے، ہم نے کسی کے بارے میں نازیبا الفاظ نہیں کہے۔ اگر کہیں غلط الفاظ استعمال بھی ہوئے ہیں تو انہیں درگزر کریں۔ میں یہ سننا بھی نہیں چاہتا کہ کون سے الفاظ استعمال ہوئے ہیں۔

انہوں نے کہا کہ بانی پی ٹی آئی نے ہمیشہ بہترین الفاظ استعمال کیے اور کسی کی بے توقیری نہیں کی۔

مزید پڑھیں: خواجہ آصف نے میرے دادا کا نام لے کر غیر پارلیمانی الفاظ استعمال کیے، عمر ایوب

چیئرمین پی ٹی آئی کا کہنا تھا کہ تنقید کرنا ہر شخص کا حق ہے اور کوئی قانون سے بالاتر نہیں ہے۔ ہم اچھی باتیں کر رہے ہیں، لیکن ہماری اچھی باتوں کو جگہ نہیں دی جا رہی۔