عدالتیں بھی محفوظ نہیں رہیں: سابق وزیر اعظم شاہد خاقان عباسی

?️ 9 فروری 2021

اسلام آباد {سچ خبریں} سابق وزیرِاعظم  مسلم لیگ نون کے راہنما شاہد خاقان عباسی نے کہا ہے کہ آج عدالتیں بھی محفوظ نہیں رہیں، آئین و قانون اور عدالتوں کا یہ حال ہوگا توملک کے ساتھ بڑی نا انصافی ہو گی۔

اسلام آبادکی احتساب عدالت میں پیشی کے موقع پر میڈیا سے گفتگو کرتے ہوئے سابق وزیرِ اعظم شاہد خاقان عباسی گزشتہ روز اسلام آباد ہائی کورٹ پر وکلاء کے حملے اور توڑ پھوڑ کے واقعے پر اظہارِ خیال کر رہے تھے۔

یہ بھی پڑھیں: پی ڈی ایم سےمتعلق مگوئیوں پر بابر افتخار کا دوٹوک موقف

انہوں نے کہا کہ یہ وفاقی دارالحکومت میں امن و امان کی صورتِ حال ہے، حکومت وکلاء سے اشتعال انگیزی کرے گی تو آگے سے بھی اشتعال انگیزی ہی ہو گی۔

شاہد خاقان عباسی نے کہا کہ کسی کا دفتر یا کوئی جگہ گرانے سے پہلے نوٹس دیا جاتا ہے، پہلے بتایا جاتا ہے، آگاہ کیا جاتا ہے، بغیر نوٹس کے گرائیں گے تو کل والا واقعہ دیکھ لیں۔

انہوں نے مزید کہا کہ ملک کے حکمرانوں کو آئین و قانون کی کوئی پرواہ نہیں ہے۔

سابق وزیرِ اعظم کا یہ بھی کہنا ہے کہ جب حکومت عوام کی نمائندہ نہ ہو تو یہی ہوتا ہے جو ملک میں ہو رہا ہے۔