گڈو پاور پلانٹ میں فنی خرابی کے باعث آگ لگ گئی‘ کئی شہروں کی بجلی معطل

?️ 31 دسمبر 2023

حیدرآباد: (سچ خبریں) گڈو پاور پلانٹ کی ٹرانسمیشن لائن میں فنی خرابی کے باعث دھماکہ ہوا جس کے نتیجے میں آتشزدگی کی وجہ سے سندھ پنجاب اوربلوچستان کے کئی علاقوں کو بجلی کی فراہمی معطل ہوگئی۔

تفصیلات کے مطابق گڈو تھرمل پاور ہاؤس کے 500 کے وی سوئچ یارڈ ٹرپ ہونے کے بعد آگ لگ گئی جس کے بعد گڈو پلانٹ کے گرڈ اسٹیشن میں ایمرجنسی نافذ کردی گئی، فنی خرابی کے باعث پاور ہاؤس کے سوئچ یارڈ میں دھماکہ ہوا، پاور پلانٹ میں لگنے والی آگ تو بجھادی گئی تاہم لائنیں ٹرپ ہو نے سے سندھ، پنجاب اور بلوچستان کے مختلف اضلاع کو بجلی کی فراہمی معطل ہوگئی۔

ذرائع کا کہنا ہے کہ کشمور،کندھ کوٹ،شکار پور ،لاڑکانہ ، سکھر ، جعفرآباد، نصیرآباد، اوستہ محمد، صحبت پور،ب ولان ، سبی، ڈی جی خان، راجن پور اوررحیم یارخان میں بجلی معطل ہوگئی، مرمتی کام میں دھند کی وجہ سے تاخیر ہوئی دھند کم ہوتے ہی بجلی بحال کردی جائے گی، تاہم شدید دھند کی وجہ سے مرمتی کام سست روی کا شکار ہونے سے 9 گھنٹے گزرنے کے باوجود بھی گڈو تھرمل پاور ہاؤس سے متاثرہ علاقوں کی بجلی بحال نہ ہوسکی۔

ادھر ملک میں بجلی کے ایک اور بڑے بریک ڈاون کا خدشہ پیدا ہو گیا، بجلی کی پیدوار مسلسل کمی سے خطرناک زون کے دہانے پر آ گئی، شارٹ فال 5 ہزار میگاواٹ سے تجاوز کر گیا اور ملک میں بجلی طلب سال کی کم ترین سطح پر آ جانے کے باوجود بجلی کی پیدوار بھی کم ترین سطح پر پہنچ جانے کا انکشاف ہوا ہے۔ میڈیا رپورٹس میں کہا گیا کہ ملک میں بجلی کی پیدوار اس قدر کم ہو چکی کہ اگر پیدوار میں مزید کمی ہوئی، تو نتیجے میں بجلی کا نظام اس خطرناک زون میں داخل ہو جائے گا جس سے پورا ملک اندھیرے میں ڈوب سکتا ہے، ملک میں کم از کم بجلی پیداوار سے فریکوئنسی کی حد ٹوٹی تو ملک پھر تاریکی میں ڈوب سکتا ہے، غیر متوازن پیداوار سے شمال، جنوب میں بجلی کا ترسیلی نظام ٹوٹ سکتا ہے۔