کورونا کی تشویشناک صورتحال، مزید 157 افراد جاں بحق

?️ 24 اپریل 2021

اسلام آباد( سچ خبریں)ملک بھر میں کورونا کی تشویشناک صورتحال ہے اور کیسز میں تیزی سے اضافہ ہو رہا ہے تاہم گزشتہ چوبیس گھنٹوں کے دوران وبا کی زد میں آ کر 157 افراد جاں بحق ہو گئے، ملک میں کورونا انفیکشن سے انتقال کرنے والوں کی مجموعی تعداد 16 ہزار 999 ہو گئی ہے، جب کہ ملک میں 7 لاکھ 90 ہزار 16 پازیٹو کورونا کیس سامنے آ چکے ہیں۔

تفصیلات کے مطابق نیشنل کمانڈ اینڈ آپریشن سینٹر نے گزشتہ روز کے اعداد و شمار جاری کرتے ہوئے کہا ہے کہ ملک میں24 گھنٹوں میں کورونا کے مزید ایک سو ستاون مریض انتقال کر گئے۔گزشتہ 24 گھنٹوں میں ملک میں 52 ہزار 402 کرونا ٹیسٹ کیے گئے، جن میں کرونا کے 5 ہزار 908 نئے کیسز کی تصدیق ہوئی، این سی او سی کے مطابق 24 گھنٹوں میں کورونا کے ٹیسٹ مثبت آنے کی شرح 11.27 فی صد رہی۔

ملک بھر میں کورونا کے 560 مریض وینٹی لیٹرز پر رکھے گئے ہیں، جب کہ ملک کے 633 اسپتالوں میں کورونا کے 5561 مریض زیر علاج ہیں، فعال کیسز کی تعداد 86 ہزار 529 ہے۔

پنجاب میں 2 لاکھ 85 ہزار 542 کیسز، سندھ میں 2 لاکھ 76 ہزار 670 کورونا کیسز، خیبر پختون خوا میں 1 لاکھ 12 ہزار 140 کورونا کیسز، بلوچستان میں 21 ہزار 477 کورونا کیسز، اسلام آباد میں 72 ہزار 613 کورونا کیسز، گلگت بلتستان میں 5 ہزار 247 کیسز، اور آزاد کشمیر میں کورونا کے 16 ہزار 327 مصدقہ کیسز رپورٹ ہو چکے ہیں۔

واضح رہے کہ گزشتہ روز وزیر اعظم عمران خان نے کورونا کی بگڑتی صورت حال کے پیش نظر شہروں میں فوج بھی طلب کر لی ہے، فوج طلب کرنے کا مقصد ایس او پیز پر مکمل عمل درآمد کرانا ہے، اس فیصلے کے بعد پاک فوج نے اسلام آباد میں ذمہ داری سنبھال لی ہے اور انتظامیہ کے ہمراہ مختلف علاقوں میں گشت شروع کر دیا گیا ہے۔