چوہدری پرویز الٰہی کا مریم نواز اور وزیراعظم کی مبینہ آڈیو لیک پر ردعمل

?️ 25 ستمبر 2022

لاہور: (سچ خبریں) مسلم لیگ ن کی نائب صدر مریم نواز اور وزیراعظم شہباز شریف کی مبینہ آڈیو لیک پر وزیراعلیٰ پنجاب چوہدری پرویز الٰہی کا ردعمل آگیا۔

تفصیلات کے مطابق سماجی رابطوں کی ویب سائٹ ٹوئٹر پر ایک ٹویٹ میں انہوں نے لکھا کہ میرےخلاف باتیں کرکے مریم نواز نے اپنی اصلیت بتائی ہے، شریف خاندان کی سوچ ہی ایسی ہے، میں نے اور مونس الٰہی نے عمران خان کا ساتھ اسی وجہ سے دیا۔

وزیراعلیٰ پنجاب چوہدری پرویز الٰہی   نے کہا کہ شہباز شریف کو خدا کاخوف نہیں، بیرون ملک جاکر کہتا ہے میں نے پیسے مانگنے نہیں تھے لیکن مجبور ہوں دے دیں، مجھے تو ڈر تھا کہ یہ ان سے واپسی کی ٹکٹ بھی نہ مانگ لے۔

ادھر مسلم لیگ ن کی نائب صدر مریم نواز اور وزیراعظم شہباز شریف کی آڈیو لیک پر چوہدری مونس الٰہی نے دلچسپ ویڈیو شیئر کردی، ٹوئٹر پر جاری کردہ اپنے ایک بیان میں مونس الٰہی نے مریم نواز اور وزیراعظم کی آڈیو لیک پر طنزیہ ویڈیو شیئر کردتے ہوئے لکھا کہ مجھے مریم نواز اور شہباز شریف کی بات سن کر حیرت ہوئی، سارا خاندان ہی فراڈ ہے، خراب تو چوہدری پرویزالٰہی نے ان کا وزیر اعلیٰ بن کر ہونا تھا لیکن اللہ پاک نے ہم سب کو بچا لیا۔

خیال رہے کہ چوہدری برادران کے درمیان اختلافات پر مریم نواز اور شہباز شریف کی گفتگو کی مبینہ آڈیو سامنے آ گئی، جس میں مریم نواز کہتے ہوئے سنا جاسکتا ہے کہ مجھے لگتا ہے مونس نے اسے بہت خراب کیا۔ جس پر شہباز شریف نے کہا خراب ہونے والے کو ہی خراب کیا جاتا ہے۔ مریم نواز نے کہا کہ اس نے بیٹے کی باتوں میں آ کر سب کچھ برباد کر دیا، چوہدری شجاعت کو اس بات کو اوپن کرنا چاہیے تھا۔

وزیراعظم نے کہا کہ گھر کو تقسیم کر دیا، بڑا بھائی زندگی بھر چھوٹے بھائی کی راہیں ہموار کرتا رہا، اس کے بچے کو تیار کیا، ظاہر ہے اس نے اپنے بچوں کا مستقبل بھی دیکھنا تھا، دو تین مہینے پہلے چوہدری پرویز نے عمران سے رابطہ کیا تھا۔ مریم نواز نے کہا کہ انکل جو اپنے بھائی کا نہیں ہوا وہ کسی کا نہیں بن سکتا، باپ جیسا بھائی، ابھی بھی اس کے ظلم پر بولتا نہیں۔