پنجاب کے 10 کروڑ لوگ فری آٹا اسکیم سے مستفید ہو رہے ہیں، شہباز شریف

?️ 27 مارچ 2023

اسلام آباد:(سچ خبریں) وزیر اعظم شہباز شریف نے کہا ہے کہ 75 سال میں یہ پہلا ماڈل ہے، جس کو آزمایا جارہا ہے، پنجاب کے 10 کروڑ لوگ فری آٹا اسکیم سے مستفید ہو رہے ہیں۔

راولپنڈی میں آٹا فراہمی مرکز کے دورے کے موقع پر شہباز شریف کا کہنا تھا کہ یقیناً یہاں پر پنجاب کے علاوہ بھی دوسرے صوبوں کے بھائی، بہنیں جو راولپنڈی میں رزق حلال کماتے ہیں، خیبرپختونخوا، کشمیر، گلگت بلتستان سے لوگ یہاں پر ہیں، انہیں سہولت فراہم کرنے کے لیے انتظامیہ پوری کوشش کررہی ہے کہ ان کو دقت نہ ہو۔

ان کا کہنا تھا کہ دوسرا بڑا مسئلہ یہ ہے کہ بے شمار لوگ ایسے ہیں جو بے نظیر انکم سپورٹ پروگرام کے ریکارڈ پر نہیں ہیں لیکن وہ بھی خطِ افلاس سے کم پر زندگی بسر کررہے ہیں، ان کو دقت پیش آ رہی ہے، کل رات تک طے ہوا تھا کہ یہ مسئلہ حل ہو جائے گا، آج صبح نادرا اور پنجاب انفارمیشن ٹیکنالوجی بورڈ نے اس سارے چیلنج کا حل تجویز کیا۔

وزیراعظم شہباز شریف کا کہنا تھا کہ آج صبح انہوں نے آپریٹ کرنے کی کوشش کی لیکن وہ ذرا سست تھا، مجھے امید ہے کہ آج یہ سسٹم پوری طرح آپریٹ ہو جائے گا، اور جو لوگ یہاں آرہے ہیں اور جنہیں کہا جارہا ہے کہ ان کے نام نہیں ہیں یا آپ کا اندراج نہیں ہے، ان کے لیے وہاں پر علیحدہ کاؤنٹرز کھولے جائیں گے، وہیں اندراج ہوگا اور ان کو فری آٹا مہیا کیا جاسکےگا۔

انہوں نے کہا کہ اسی طرح جنہوں نے ابھی تک (آٹے کا) ایک بھی تھیلا نہیں لیا، کل سے ان کو یکشمت تین تھیلے ملیں گے تاکہ ان کو دو بار نہ آنا پڑے۔

شہباز شریف نے مزید کہا کہ نظام میں بتدریج بہتری آرہی ہے، یقیناً میں بلاخوفِ تردید یہ بات کہہ سکتا ہوں کہ ہر جگہ انتظامیہ، پولیس اور سب مل کر اس نظام کو (بہتر بنا رہے ہیں)، اور یہ پاکستان کی تاریخ میں پہلا موقع ہے کہ اس طرح کے منصوبے کو لانچ کیا گیا، ہم ماضی میں رعایتی نرخوں پر آٹا ہر دوکان پر دیتے تھے لیکن اس بار یہ طے ہوا کہ فری آٹا دیا جائے اور یہ بہت بڑا چیلنج ہے۔

ان کا کہنا تھا کہ اس (منصوبے) کو کامیاب کرنے کے لیے وزیراعلیٰ پنجاب اور پنجاب کی پوری انتظامیہ، اسی طرح اسلام آباد کی پوری انتظامیہ، وزیر داخلہ اور ہم سب مل کر کام کررہے ہیں اور میں ہر روز دیکھ رہا ہوں کہ یہ جذبہ بہت آگے جا رہا ہے، روزے رکھ کر روزے داروں کی توقیر کا پورا لحاظ کیا گیا ہے، یہاں پر کرسیاں ہیں، کسی کو اب کھڑے ہونے کی زحمت نہیں دی جاتی، معذروں کے لیے علیحدہ کاؤنٹر بنائے گئے ہیں۔

وزیراعظم نے کہا کہ پوری محنت اور کوشش سے نظام میں ہردن بہتری آرہی ہے، 75 سال میں یہ پہلا ماڈل ہے، جس کو آزمایا جارہا ہے، لیکن حالات کی سنگینی ایسی ہے کہ ہمارا معاشی چیلنج بھی بہت بڑا ہے، پنجاب کے 10 کروڑ لوگ اس فری آٹا اسکیم سے مستفید ہو رہے ہیں، یہ بہت بڑی کوشش ہے، اس کی جتنی تحسین کی جائے اتنی کم ہے۔

شہباز شریف کا مزید کہنا تھا کہ الحمد اللہ، جذبہ جوان ہے، ہمت جوان ہے، ہم نے مل کر پاکستان کی قسمت بدلنی ہے۔