وزیر داخلہ نے بھارتی وزیرداخلہ کا پاکستان پر دہشت گردی کا الزام جھوٹ قراردیا

?️ 10 اگست 2021

راولپنڈی (سچ خبریں) وفاقی وزیر داخلہ شیخ رشید نے بھارتی وزیرداخلہ کا پاکستان پر مقبوضہ کشمیر میں دہشت گرد بھیجنے کا الزام جھوٹ قرار دیتے ہوئے کہا کہ بھارتی وزیرداخلہ کے بیان کی شدید مذمت کرتے ہیں، بھارت کے پاس کوئی ثبوت ہے تو پاکستان کو دے۔

تفصیلات کے مطابق وفاقی وزیر داخلہ شیخ رشید نے میڈیا سے گفتگو کرتے ہوئے کہا ہے کہ اسرائیل ،این ڈی ایس اور بھارت خطے کو نقصان پہنچانا چاہتے ہیں، ان کا ایجنڈا یہ ہے کہ پاکستان کو اندر سے نقصان پہنچایا جائے۔

محرم الحرام میں سیکیورٹی کے حوالے سے وفاقی وزیر داخلہ کا کہنا تھا کہ محرم الحرام میں تمام مجالس ، جلوسوں کو فل پروف سیکیورٹی دیں گے ، ہم کسی کے عقیدے کو چھیڑیں گے اور اپنے عقیدے کو چھوڑیں گےنہیں، حالات کا تقاضا ہے کہ ہر مسلمان اپنی ذمہ داری کا ثبوت دے ، محرم میں تمام عزاداروں سے اپیل ہے ایس اوپیز پر عمل کریں۔

شیخ رشید نے بھارتی وزیرداخلہ کا پاکستان پر مقبوضہ کشمیر میں دہشت گرد بھیجنے کا الزام جھوٹ قرار دیتے ہوئے کہا بھارت کے پاس کوئی ثبوت ہے تو پاکستان کو دے ، بھارتی وزیرداخلہ کے بیان کی شدید مذمت کرتے ہیں۔

نور مقدم کیس کے حوالے سے ان کا کہنا تھا کہ نورمقدم کیس میں جو بھی ملوث ہے ان کا نام ای سی ایل میں ڈال دیاگیا ہے۔داسو حملے سے متعلق وفاقی وزیر نے کہا کہ داسو واقعے پر سیکیورٹی ایجنسیز نے تحقیقات مکمل کرلیں ہیں، ہماری ایجنسیزاور اداروں کے ذمہ جو کام تھا وہ مکمل ہوچکا ہے، این ڈی ایس، بھارت ، اسرائیل نے جو کوشش کی وہ شکست کھائیں گے۔

افغانستان کی صورتحال کے حوالے سے شیخ رشید کا کہنا تھا کہ امن کے داعی ہیں افغانستان کی سیاست سے کوئی تعلق نہیں، افغانستان کی سلامتی پاکستان کے لئے بہت اہم ہے انٹرنیشنل میڈیا پر اچھالی جانیوالی باتیں سب پلان کے تحت ہیں، امن کیلئے دہشتگردی کیخلاف پاکستان نے پہلے بھی جانوں کانذرانہ پیش کیا۔

افغان سفیر کی بیٹی کے اغوا کے معاملے سے متعلق انھوں نے کہا کہ افغان سفیر کی بیٹی خود جرمنی چلی گئی ہیں ،افغان سفیر کی بیٹی سے فون اور ریکارڈ مانگا ہے مگر وہ تعاون نہیں کررہے۔وزیر داخلہ کا مزید کہنا تھا کہ دو نمبر شناختی کارڈ بنانیوالے تمام لوگوں کو نادراسے نکالیں گے، جلد وزیراعظم کو نادرا کے دورے کی دعوت دیں گے، خواہش ہےآئی ڈی کارڈ کو ڈرائیونگ ، اسلحہ لائسنس کیلئے بھی استعمال کریں۔