وزیر خارجہ، مفتی منیب کا معاہدے کی تفصیل بتانے سے انکار

🗓️ 31 اکتوبر 2021

اسلام آباد(سچ خبریں) وزیرِ خارجہ شاہ محمود قریشی اور مفتی منیب الرحمٰن نے کالعدم تنظیم کے ساتھ ہونے والے معاہدے کی تفصیلات بتانے سے انکارکر دیا نیوز کانفرنس کے دوران وزیر خارجہ کا کہنا تھاکہ کہ امتشار میں پاکستان کا کوئی فائدہ نہیں گذشتہ کچھ دنوں سے املاک اور جانی نقصانات کا مشاہدہ کیا گیا ہے۔

وزیرِ خارجہ مخدوم شاہ محمود قریشی کا کہنا ہے کہ قومی سلامتی کمیٹی کے اجلاس میں فیصلہ ہوا کہ مذاکرات کو ترجیح دینی ہے۔یہ بات وزیرِ خارجہ مخدوم شاہ محمود قریشی نے سابق چیئرمین رویتِ ہلال کمیٹی مفتی منیب الرحمٰن ، اسپیکر قومی اسمبلی اسد قیصر، وزیرِ مملکت علی محمد خان کے ہمراہ نیوز کانفرنس کرتے ہوئے کہی ہے۔

انہوں نے کہا کہ امن اور بہتری کا راستہ تلاش کیا گیا ہے، پاکستان کو متحد اور متفق دیکھنے کے خواہش مند ہیں۔وزیرِ خارجہ نے مزید کہا کہ نیشنل سیکیورٹی کمیٹی کے اجلاس میں فیصلہ ہوا کہ دانش سے مسئلے کو حل کرنے کو ترجیح دی جائے گی۔شاہ محمود قریشی نے یہ بھی کہا ہے کہ انتشار میں پاکستان کا فائدہ نہیں، گزشتہ کچھ دنوں میں ملک میں املاک اور جانی نقصان ہوتے ہوئے دیکھا ہے اور ملک کے بعض علاقوں میں حالات معمول پر نہیں ہیں۔