وزیر اعظم نے جوہری سہولت گاہ کا دورہ کیا

?️ 30 مئی 2021

اسلام آباد (سچ خبریں) وزیر اعظم عمران خان نے پاک فوج کی اسٹریٹجک فورسز کمانڈ کی زیر انتظام جوہری سہولت گاہ کا دورہ کیا 1998 کے ایٹمی دھماکوں کی 23 ویں سالگرہ کے ایک روز بعد ہونے والا یہ دورہ بظاہر اسی سے متعلق ہے۔

وزیراعظم عمران خان نے جب سے وزارت عظمیٰ کا منصب سنبھالا ہے اس وقت سے کسی جوہری سائٹ پر یہ ان کا پہلا دورہ تھا۔انہوں نے اب تک نیشنل کمانڈ اتھارٹی کے کسی اجلاس کی صدارت بھی نہیں کی۔خیال رہے کہ وزیراعظم این سی اے کے سربراہ بھی ہیں جو جوہری معاملات کے فیصلے کرنے کا اعلیٰ ترین ادارہ ہے۔

دفتر وزیراعظم سے جاری ہونے والے بیان کے مطابق دورے کے دوران وزیراعظم کو پاکستان کے اسٹریٹجک پروگرام کے مختلف پہلوؤں پر بریفنگ دی گئی۔

وزیر اعظم نے پاکستان کے اسٹریٹجک پروگرام سے وابستہ تمام سائنسدانوں اور اہلکاروں کی انتھک کوششوں کو سراہا اور اس کا اعتراف کیا اور ساتھ ہی انہوں نے قومی دفاع کو مضبوط بنانے کے لیے پاکستان کی ایٹمی صلاحیت اور تحفظ پر مکمل اعتماد کا اظہار کیا۔

وزیر اعظم کی آمد پر ان کا استقبال چیئرمین جے سی ایس سی جنرل ندیم رضا اور ڈائریکٹر جنرل اسٹریٹجک پلانز ڈویژن لیفٹیننٹ جنرل ندیم ذکی منج نے کیا۔