وزیر اعظم مہنگائی کی وجہ سے عارضی مشکلات جلد دورہونے کے لئے پر امید

?️ 30 ستمبر 2021

اسلام آباد (سچ خبریں) وزیراعظم عمران خان مہنگائی کی وجہ سے عارضی مشکلات جلد دور ہونے کے لئے پر امید ہیں ان کا کہنا ہے کہ لائن لاسز بڑھنےسے نقصان عوام کو مہنگی بجلی کی صورت میں بھرنا پڑتا ہے، امید ہے مہنگائی کی وجہ سے عارضی مشکلات بھی جلد دور ہو جائیں گی۔

تفصیلات کے مطابق اسلام آباد میں کے وی 600مٹیاری تالاہورٹرانس میشن لائن کی افتتاحی تقریب کا انعقاد کیا گیا ، منعقدتقریب میں وزیراعظم مہمان خصوصی تھے۔وزیراعظم عمران خان نےمٹیاری تا لاہور ٹرانسمیشن لائن کاافتتاح کردیا، 886کلومیٹرطویل لائن 4ہزارمیگاواٹ بجلی ترسیل کی صلاحیت رکھتی ہے ،ٹرانس میشن لائن کے لیے 1973 ٹاورز تعمیر کیے گئے ہیں۔

تقریب سے خطاب کرتے ہوئے وزیراعظم عمران خان نے کہا کہ مٹیاری لاہور ٹرانسمیشن لائن کےافتتاح پر سب کوخراج تحسین پیش کرتاہوں ، 2018میں تیزی سے منصوبے پر کام مکمل کیاگیا ، مٹیاری تا لاہور ٹرانسمیشن لائن منصوبہ 2013سے التواکاشکارتھا، لائن لاسز بڑھنےسے نقصان عوام کو مہنگی بجلی کی صورت میں بھرنا پڑتا ہے۔

وزیراعظم کا کہنا تھا کہ سی پیک چینی صدرکے ون بیلٹ پروگرام کا فلیگ شپ منصوبہ ہے ، ہماری ٹرانسمیشن لائن بہت پرانی ہوچکی ہیں جس سے لائن لاسز کا سامناہے، ابتک بجلی کےپراجیکٹ میں 17فیصد لائن لاسز ہے، ایک فیصد لائن لاسز سے لاکھوں کا نقصان ہوتاہے۔

سی پیک کے حوالے سے عمران خان نے کہا کہ سی پیک کے منصوبوں پر تیزی سے کام جاری ہے، کورونا کی وجہ سے سی پیک میں بھی مسائل کاسامنا رہا، بہت امتحانوں سے گزرنا پڑا، قیمتیں بڑھیں،سپلائی چین متاثرہوئی۔ان کا کہنا تھا کہ ویکسینیشن تیزی سے بڑھ رہی ہے،کوروناکاخوف کم ہورہاہے، امید ہے کورونا کی آئندہ لہر کی شدت کم ہوگی اور مہنگائی کی وجہ سے عارضی مشکلات بھی جلد نیچے آئیں گی۔