اسلام آباد:(سچ خبریں) وزیرخارجہ بلاول بھٹو زرداری 14 سے 21 دسمبر امریکا کا سرکاری دورہ کریں گے، جہاں وہ نیویارک اور واشنگٹن میں متعلقہ حکام کے ساتھ دو طرفہ امور ، علاقائی مسائل پر تبادلہ خیال کریں گے۔
دفتر خارجہ کی طرف سے جاری بیان کے مطابق وزیر خارجہ بلاول بھٹو زرداری دورے کا آغاز اقوام متحدہ کے سیکرٹری جنرل انتونیو گوتیرس کے ساتھ ملاقات سے کریں گے اور 14 دسمبر کو اقوام متحدہ کی سلامتی کونسل میں بین الاقوامی امن اور سلامتی کی بحالی کے لیے ’کثیر الطرفہ تعلقات کے لیے نئی سمت‘ کے موضوع پر اعلیٰ سطح کے اجلاس میں شرکت کریں گے۔
دفتر خارجہ کے مطابق وزیر خارجہ بلاول بھٹو زرداری نیویارک میں 15 سے 16 دسمبر تک جی -77 اور چین کی وزارتی کانفرنس کی میزبانی اور صدارت کریں گے۔
دفتر خارجہ نے بتایا کہ کانفرنس کے ایجنڈے میں عالمی وبا کورونا وائرس، موسمیاتی تبدیلی کی وجہ سے پیدا ہونے والی آفات اور جغرافیائی سیاسی پیش رفت کے حوالے سے ترقی پذیر ممالک کو پائیدار ترقیاتی اہداف ( ایس ڈی ایس جی) کے حصول میں درپیش متعدد چیلنجز شامل ہیں۔
دفتر خارجہ کے مطابق وزیر خارجہ 19 دسمبر کو واشنگٹن کا دورہ کرنے کے ساتھ ساتھ اعلیٰ سطح کے سرکاری حکام، کانگریس کے رہنماؤں، پاکستانی نژاد امریکی تاجروں اور کمیونٹی کے ارکان سے ملاقاتیں کریں گے جبکہ تھنک ٹینکس اور میڈیا کے ساتھ بھی بات چیت کریں گے۔
دفتر خارجہ نے مزید کہا کہ سرکاری ملاقاتوں کے دوران وزیر خارجہ دو طرفہ تعلقات، باہمی مفادات کے علاقائی مسائل پر تبادلہ خیال کریں گے تاکہ دونوں ممالک کے درمیان بالخصوص تجارت، سرمایہ کاری، موسمیاتی تبدیلی اور اقتصادی ترقی کے شعبوں میں دو طرفہ تعلقات کو مزید بہتر بنایا جا سکے۔
وزیر خارجہ بلاول بھٹو زرداری موسمیاتی تبدیلی کے حوالے سے پاکستان کے نکتہ نظر کا اشتراک کریں گے اور پاکستان میں موسمیاتی سیلاب سے ہونے والے شدید نقصان اور حکومت کی طرف سے تعمیر نو اور بحالی کے اقدامات سے بھی آگاہ کریں گے۔
