وزیراعظم کی پی این ایس سی کو عالمی معیار کی شپنگ کمپنی میں بدلنے کیلئے جامع منصوبہ تیار کرنے کی ہدایت

?️ 10 جولائی 2025

اسلام آباد: (سچ خبریں) وزیراعظم شہباز شریف نے حکام کو ہدایت کی ہے کہ پاکستان نیشنل شپنگ کارپوریشن (پی این ایس سی) کو بین الاقوامی معیار کی شپنگ کمپنی میں تبدیل کرنے کے لیے جامع منصوبہ تیار کیا جائے۔

وزیراعظم نے پی این ایس سی کی تنظیم نو، اصلاحات اور کارکردگی کا جائزہ لینے کے لیے منعقدہ اجلاس کی صدارت کرتے ہوئے کہا کہ پاکستان کے شپنگ شعبے میں سرمایہ کاری کی بڑی صلاحیت موجود ہے۔

وزیراعظم شہباز شریف نے کہا کہ پاکستان کے جہاز رانی کے شعبے میں سرمایہ کاری کی وسیع استعداد موجود ہے، اس شعبے میں نجی سرمایہ کاری کی حوصلہ افزائی کیلئے جامع پلان مرتب کرکے پیش کیا جائے۔

انہوں نے ہدایت کی کہ بحری جہازوں کی تعداد میں اضافہ کیا جائے اور پاکستان میں کارگو کی آمدو رفت کیلئے مسابقتی بنیادوں پر پی این ایس سی کے جہازوں کے استعمال کوفروغ دیا جائے۔

وزیراعظم نے ہدایت کی کہ پی این ایس سی کو بین الاقوامی معیار کی شپنگ کمپنی بنانے کیلئے شعبے کے ماہرین و کنسلٹنٹس کی خدمات حاصل کی جائیں۔

انہوں نے کہا کہ پاکستان نیشنل شپنگ کارپوریشن کی اصلاحات سے شپنگ کی مد میں قیمتی زر مبادلہ کی بچت ہوگی اور مقامی سی فیئررز کیلئے روزگار کے مواقع بڑھیں گے۔

اجلاس کے شرکاء کو پی این ایس سی کی سرگرمیوں، موجودہ جہازوں کی تعداد، پاکستان میں سالانہ کارگو کی نقل و حرکت اور ادارے کے مستقبل کے توسیعی منصوبوں پر بھی بریفنگ دی گئی۔

اجلاس میں وفاقی وزرا احد خان چیمہ، جنید انور چوہدری اور متعلقہ سینئر حکام نے شرکت کی۔