موسمیاتی تبدیلی: پاکستان میں پانی کے غیر زرعی استعمال میں نمایاں اضافہ متوقع ہے، عالمی بینک

🗓️ 16 فروری 2025

اسلام آباد: (سچ خبریں) عالمی بینک نے کہا ہے موسمیاتی تبدیلیوں کی وجہ سے پاکستان میں غیر زرعی مقاصد کے لیے پانی کے استعمال میں نمایاں اضافہ متوقع ہے۔

ڈان اخبار کی رپورٹ کے مطابق عالمی بینک کی تازہ رپورٹ میں کہا گیا ہے کہ پاکستان میں سالانہ 4.9 فیصد کی بلند شرح نمو اور 2047 تک درجہ حرارت میں 3 ڈگری سینٹی گریڈ اضافے کے ساتھ پانی کی طلب میں 60 فیصد اضافے کا امکان ہے۔

درجہ حرارت کا بڑھنا پانی کے 15 فیصد اضافی استعمال کی وجہ بنے گا جبکہ آئندہ 3 دہائیوں میں غیر زرعی طلب کو پورا کرنے کے لیے آبپاشی کے 10 فیصد پانی کو دوبارہ استعمال کرنے کی ضرورت ہوگی۔

کنٹری پارٹنرشپ فریم ورک برائے 35-2026 دستاویز کے مطابق غذائی تحفظ پر سمجھوتہ کیے بغیر اتنی بڑی مقدار کو تک کرنا ایک بڑا چیلنج ہے جس کے لیے پانی کے تحفظ کی حوصلہ افزائی کرنے، زرعی شعبے میں پانی کے استعمال کی کارکردگی بڑھانے اور پانی پر مبنی فصلوں سے دور رہنے کے لیے خاطر خواہ پالیسی اصلاحات کی ضرورت ہوگی۔

پنجاب میں ورلڈ بینک گروپ کی شمولیت سے زرعی پالیسی اور پانی کے انتظام میں اصلاحات کے ساتھ ساتھ ماحولیاتی لچک کی حامل زرعی تبدیلی کو فروغ دینے کے لیے مارکیٹوں اور ویلیو چینز تک رسائی میں مدد ملے گی جبکہ بلوچستان اور سندھ میں آپریشنز سے سیلاب سے متاثرہ علاقوں میں انفرااسٹرکچر کو مضبوط بنانے میں مدد ملے گی۔

انٹرنیشنل فنانس کارپوریشن (آئی ایف سی) ویلیو چینز کی ترقی میں زرعی سرمایہ کاری پر توجہ بڑھائے گی، عالمی بینک اور آئی ایف سی مشترکہ طور پر نیشنل کلائمیٹ فنانس اسٹرٹیجی کے مطابق کلائمیٹ فنانس موبلائزیشن کی کوششوں کی حمایت کریں گے اور بین الاقوامی موسمیاتی فنانس اور نجی سرمائے تک رسائی کو آسان بنانے کے آپشنز تلاش کریں گے۔

نیا فریم ورک متنوع زرعی شعبے کی مدد کرے گا جو پانی کی قلت، خشک سالی اور بارش کے بدلتے ہوئے طریقوں کے لیے لچکدار ہے۔

عالمی بینک کی مداخلت سے غیر موثر، مسخ شدہ اور ناقص اہداف کی حامل زرعی سبسڈیز کو تحقیق، توسیعی خدمات، بنیادی ڈھانچے اور بیجوں کی ترقی جیسی عوامی خدمات پر خرچ کرنے کے لیے دوبارہ استعمال کرنے میں مدد ملے گی، اور آب و ہوا کے لچکدار حل، آب و ہوا سے متعلق اسمارٹ فارمنگ کے طریقوں اور آبی وسائل کے موثر استعمال کو فروغ ملے گا۔

بچت اسکیموں، مالی شمولیت اور نقد رقم کی منتقلی سے خشک سالی اور سیلاب کے اثرات سے غریب ترین افراد کی حفاظت میں مدد ملے گی، عالمی بینک کی ایک مداخلت سے لائیو اسٹاک اور زراعت سمیت اعلیٰ امکانات والی زرعی ویلیو چینز اور پروسیسنگ کو فروغ دینے میں مدد ملے گی۔

ویلیو چین کی فراہمی کے لیے چھوٹے کسانوں کے اتحاد کی حمایت کرنے کے ساتھ ساتھ غریب کسانوں اور خواتین کسانوں کی مالی شمولیت پر توجہ مرکوز کی جائے گی۔

آئی ایف سی پبلک پرائیویٹ پارٹنرشپ سمیت کلائمیٹ اسمارٹ ایگری فوڈ کمپنیوں اور ایگری لاجسٹکس میں سرمایہ کاری کرے گی، ملٹی انویسٹمنٹ گارنٹی ایجنسی خوراک اور غذائی تحفظ کے ساتھ نجی سرمایہ کاری کے رابطے کی حمایت کے لیے ورلڈ بینک گروپ گارنٹی پلیٹ فارم سے فائدہ اٹھانے کی کوشش کرے گی۔

ڈیجیٹلائزیشن سے زرعی ٹیکنالوجی کے حل کو ممکن بنانے میں مدد ملے گی اور اس انڈیکیٹر کے تحت مداخلت بہتر غذائیت اور متنوع غذا پر فریم ورک کے پہلے نتائج اور نجی سرمایہ کاری اور خواتین سمیت ملازمتوں پر چھٹے نتائج میں معاون ثابت ہوگی۔

دستاویز میں کہا گیا ہے کہ زراعت میں دہائیوں کی سرمایہ کاری اس شعبے کو تبدیل کرنے میں ناکام رہی ہے کیونکہ گندم کی خریداری اور قیمتوں کے تعین جیسی پالیسیوں میں بڑی خرابیاں پائی جاتی ہیں، غیر موثر سبسڈیز سمیت عوامی وسائل کو غیر منصفانہ طور پر تقسیم کیا جاتا ہے ، جس میں وسیع پیمانے پر اثر انداز ہونے والی عوامی خدمات جیسا کہ زرعی تحقیق اور توسیع پر کم توجہ دی جاتی ہے۔