فواد چوہدری کا اپوزیشن کو مشورہ، تنقید کے بجائے اپنا پروگرام پیش کرے

?️ 4 جولائی 2021

اسلام آباد (سچ خبریں) وفاقی وزیر اطلاعات فواد چوہدری نے اپوزیشن کو آڑے ہاتھوں لیتے ہوئے  کہا اپوزیشن عمران خان پر تنقید کے بجائے اپنا پروگرام پیش کرے۔  ان کا کہنا تھا کہ ابو بچاؤ ڈرامے کی ناکامی کے بعد آج مسترد سیاسی ٹولہ سوات میں نیا ڈرامہ کرنے جا رہا ہے۔

سماجی رابطے کی ویب سائٹ ٹوئٹر پر اپنے بیان میں فواد چوہدری نے کہاکہ اس ڈرامے کے تمام کردار پٹ چکے ہیں،ان سیاسی آوارہ گردوں کا نہ کوئی نظریہ نہ راستہ نہ ہی منزل ہے۔فواد چوہدری نے کہاکہ بھٹکی ہوئی روحوں کی طرح یہ لوگ کبھی ایک ڈگر پھر دوسری پر ہیں۔وفاقی وزیر نے مزید کہاکہ عمران خان پر تنقید کافی نہیں، اپنا پروگرام دیں۔

واضح رہے کہ اس سے قبل  مسلم لیگ نون کی ترجمان مریم اورنگزیب کا کہنا تھا کہ اپوزیشن اتحاد پاکستان ڈیموکریٹک موومنٹ (پی ڈی ایم) کا جلسہ آج سوات میں ہو گا، جس کے لیے تمام تیاریاں مکمل کر لی گئی ہیں۔یہ بات پاکستان مسلم لیگ نون کی ترجمان مریم اورنگزیب نے جاری کیئے گئے ایک بیان میں کہی ہے۔

انہوں نے بتایا کہ مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف کی قیادت میں مسلم لیگ نون کا وفد پی ڈی ایم کے جلسے میں شریک ہو گا۔مریم اورنگزیب نے بتایا ہے کہ صدر نون لیگ میاں شہباز شریف بالا کوٹ سے ریلی کی قیادت کرتے ہوئے جلسہ گاہ جائیں گے۔

نون لیگی ترجمان کا یہ بھی کہنا ہے کہ ریلی کا آغاز بالا کوٹ اور مالم جبہ سے دوپہر 2 بجے ہو گا۔انہوں نے یہ بھی بتایا کہ ریلی مختلف راستوں سے ہوتی ہوئی جلسہ گاہ کے مقام گراسی گراؤنڈ پہنچے گی۔