عمران خان کے بیٹوں کو دھمکیاں دینے والے خود ایکسپوز ہورہے ہیں، علی امین گنڈاپور

?️ 12 جولائی 2025

جہلم: (سچ خبریں) وزیراعلیٰ خیبرپختونخواہ علی امین گنڈاپور کا کہنا ہے کہ ریاست ہمیں تحفظ فراہم نہیں کر رہی، ملک میں جس کی لاٹھی اس کی بھینس ہے۔ پی ٹی آئی اراکین اسمبلی کے قافلے کے ہمراہ لاہور جاتے ہوئے جہلم میں میڈیا سے گفتگو کرتے ہوئے انہوں نے کہا کہ پنجاب نے بہت قربانیاں دی ہیں، پنجاب 8 فروری کو نکلا، ووٹ دیا لیکن چوری ہو گیا کیوں کہ پنجاب میں فسطائیت کا ماحول ہے، باقی صوبوں میں اور ماحول ہے انشاء اللہ پنجاب پھر نکلے گا، ہم نے 5 اگست تک تحریک کو ہر صورت اوپر لے کر جانا ہے ہماری تحریک نئے مرحلے میں داخل ہو رہی ہے اس لیے ساری پارٹی سے مشاورت کریں گے۔

وزیراعلیٰ خیبرپختونخواہ کہتے ہیں کہ عمران خان کے بیٹوں کو گرفتاری کی دھمکی دینا شرم والی بات ہے انکا پاکستان آنا حق ہے ان پر کوئی ایف آئی آر نہیں ہے یہ لوگ ایسی دھمکیاں دے کر خود کو ایکسپوز کر رہے ہیں، ریاست ہمیں تحفظ فراہم نہیں کر رہی، اس ملک میں جس کی لاٹھی اس کی بھینس ہے، اس ملک میں قانون نام کی کوئی چیز نہیں ہے، اگر عمران خان کے بیٹے اپنے والد کے لیے پاکستان آ رہے ہیں تو ان کو کیا تکلیف ہے، میرا چھوٹا بیٹا میرے ساتھ لاہور جا رہا ہے۔

بتایا گیا ہے کہ خیبرپختونخواہ کے وزیر اعلیٰ علی امین گنڈاپور آج شام لاہور پہنچیں گے اس دوران پارٹی کی جانب سے جی ٹی روڈ پر پاور شو کیا جائے گا،لاہور میں متعدد اہم سیاسی ملاقاتیں اور مشاورتی اجلاس ہوں گے، علی امین گنڈاپور لاہور میں اپوزیشن لیڈر پنجاب اسمبلی ملک احمد خان بھچر سے خصوصی ملاقات کریں گے، دورہ لاہور کے دوران علی امین گنڈاپور کی پی ٹی آئی کے سینئر رہنماؤں اور پنجاب اسمبلی کے اراکین سے بھی ملاقاتیں ہوں گی، ان ملاقاتوں کا مقصد عمران خان کی زیر قیادت جاری تحریک کو منظم اور فعال کرنا ہے، اس کے علاوہ وزیراعلیٰ خیبرپختونخواہ لاہور میں پی ٹی آئی اراکین پنجاب اسمبلی سے خطاب کریں گے، لاہور میں ان کے اعزاز میں ایک عشائیہ بھی دیا جائے گا جہاں تحریک کی حکمت عملی پر مشاورت ہوگی۔