عمران خان کی 6، بشریٰ بی بی کی ایک مقدمے میں عبوری ضمانت میں توسیع

?️ 7 جنوری 2025

اسلام آباد: (سچ خبریں) ڈسٹرکٹ اینڈ سیشن کورٹ اسلام آباد نے بانی پی ٹی آئی عمران خان کے خلاف 6 اور ان کی اہلیہ بشریٰ بی بی کے خلاف ایک مقدمے میں عبوری ضمانتوں میں 28 جنوری تک توسیع کردی۔

ڈان نیوز کے مطابق اسلام آباد کی ڈسٹرکٹ سیشن عدالت میں کیس کی سماعت ایڈیشنل سیشن جج محمد افضل مجوکہ نے کی۔

دوران سماعت بشریٰ بی بی کے وکیل کی جانب سے آج حاضری سے استثنی کی درخواست دائر کی گئی تاہم سابق خاتون اول کی درخواست ضمانت پر فیصلہ نہ سنایا جاسکا جبکہ حاضری سے استثنی کی درخواست منظور کردی گئی۔

عدالت میں جونئیر وکیل نے مؤقف اختیار کیا کہ عمران خان کے وکیل سلمان صفدر دوسرے کیس میں مصروفیات کے باعث پیش نہیں ہو سکتے۔

بعد ازاں عدالت نے بانی پی آئی اور بشریٰ بی بی کی عبوری ضمانتوں میں توسیع کرتے ہوئے سماعت 28 جنوری تک ملتوی کر دی۔

واضح رہے کہ 17 دسمبر کو اسلام آباد کی ڈسٹرکٹ اینڈ سیشن عدالت نے سابق وزیر اعظم عمران خان کی 6 اور ان کی اہلیہ بشریٰ بی بی کی ایک ضمانت قبل از گرفتاری کی درخواست پر سماعت 7 جنوری تک ملتوی کی تھی۔

بانی پی ٹی آئی کے خلاف تھانہ ترنول میں 2، ایک ایک مقدمہ تھانہ رمنا، سیکریٹریٹ، کوہسار، اور تھانہ کراچی کمپنی میں درج ہے۔ عمران خان کے خلاف 3 مقدمات 9 مئی واقعات کے تناظر میں درج ہیں جبکہ ایک مقدمہ الیکشن کمیشن کے فیصلے کے خلاف احتجاج کے تناظر میں درج ہے۔

اس کے علاوہ سابق وزیر اعظم کے خلاف ایک مقدمہ اداروں کے خلاف تقریر اور ایک مقدمہ توشہ خانہ جعلی رسیدوں پر درج ہے جبکہ سابق خاتون اول بشریٰ بی بی کے خلاف توشہ خانہ جعلی رسیدیں جمع کرانے پر تھانہ کوہسار میں فوجداری کا مقدمہ درج ہے۔