شریف خاندان جب بھی اقتدار میں آتا ہے ملک کی سالمیت خطرے میں پڑ جاتی ہے، اپوزیشن لیڈر

?️ 24 اپریل 2025

اسلام آباد: (سچ خبریں) قومی اسمبلی میں اپوزیشن لیڈر عمر ایوب خان کا کہنا ہے کہ شریف خاندان جب بھی اقتدار میں آتا ہے ملک کی سالمیت خطرے میں پڑ جاتی ہے۔

اسلام آباد ہائیکورٹ میں میڈیا سے گفتگو کرتے ہوئے انہوں نے کہا کہ شریف خاندان بھارت کے خلاف سخت ایکشن نہیں لے سکتا کیوں کہ یہ اُن کے ساتھ کاروبار کرتے ہیں، سخت ایکشن صرف ایک شخص لے سکتا ہے اور وہ عمران خان ہے لیکن میرا لیڈر جیل میں بند ہے، میں اپوزیشن لیڈر ہوں میں نے اپنے لیڈر سے ہدایات لینی ہیں کیوں کہ ہم جنگ کے دہانے پر کھڑے ہیں، بھارت کی مودی حکومت نے سندھ طاس معاہدہ معطل کر دیا ہے، ہم اڈیالہ جاتے ہیں تو وہاں پر حوالدار کھڑا ہوتا ہے وہ کہتا ہے کرنل بیٹھا ہوا ہے وہ کہہ رہا ہے اندر نہ آنے دیں۔

پی ٹی آئی رہنماء نے الزام عائد کیا کہ شریف خاندان جب بھی اقتدار میں آتا ہے ملک کی سالمیت خطرے میں پڑ جاتی ہے، نواز شریف 1997ء میں وزیراعظم اور میرے والد وزیرخارجہ تھے تو بھارت کا Mig 25 اسلام آباد کے اوپر اُڑا اور دو سانک دھماکے کیے، میرے والد نے ایئرچیف کو کہا کہ فائٹر جیٹس دہلی کے اوپر سے اڑا سکتے ہیں تو انہوں نے وزیراعظم کی اجازت مانگی تو نواز شریف کی کانپیں ٹانگ گئی تھیں، اسی طرح ایٹمی دھماکوں میں میرے والد سمیت پانچ لوگ تھے جنہوں نے کہا ایٹمی دھماکے ہوں گے، وزیراعظم صبح کلنٹن سے بات کر رہے تھے کہ وہ ڈیل چاہتے ہیں تو میرے والد نے کہا کہ نیوکلیئر ڈیوائسز سیل ہوچکی ہیں اب چاغی میں دھماکے ضرور ہوں گے تو اس طرح دھماکے ہوئے۔

اس موقع پر عمر ایوب خان سے سوال کیا گیا کہ ’قومی سلامتی کمیٹی کے اجلاس میں آج کیے جانے والے فیصلوں میں آپ اپنے وزیراعظم کے ساتھ کھڑے ہوں گے؟‘ اس کے جواب میں اپوزیشن لیڈر نے کہا کہ ’نیشنل سیکیورٹی کمیٹی اجلاس کا ہمیں قومی اسمبلی اور سینیٹ کے اپوزیشن لیڈران کو علم ہی نہیں، ملک کو اس وقت متحد صرف ایک شخص عمران خان کر سکتا ہے آپ نے اُسے جیل میں بند رکھا ہوا ہے اور رابطہ نہیں ہونے دیا جا رہا، اختر جان مینگل، ماہرنگ بلوچ معاملہ، پی ٹی آئی رہنماؤں و کارکنوں کو آپ نے بند رکھا ہوا ہے، کون سے ملک کی اور کونسی نیشنل سیکیورٹی کی بات آپ کر رہے ہیں۔