شاہ محمود قریشی کا9مئی مقدمات میں 9روزہ جسمانی ریمانڈ منظور

🗓️ 28 مئی 2024

لاہور: (سچ خبریں) انسداد دہشتگردی عدالت لاہور نے پی ٹی آئی رہنماء شاہ محمود قریشی کا9مئی کے 9مقدمات میں 9روزہ جسمانی ریمانڈ منظورکرلیا، انسداد دہشتگردی عدالت کے جج خالد ارشد نے گزشتہ روز محفوظ کئے جانے والا فیصلہ جاری کردیا۔عدالت کے تحریری حکم نامے میں کہا گیا ہے کہ شاہ محمود قریشی سے تفتیش سے متعلق رپورٹ 5 جون کو عدالت کے روبرو پیش کی جائے۔

شاہ محمود قریشی سے ویڈیو لنک کے ذریعے تفتیش کی جائے۔تفتیشی افسر کے مطابق ملزم نے سوشل میڈیا پر ویڈیوز اور پیغامات جاری کئے تھے۔پولیس کا کہنا تھا کہ شاہ محمود قریشی سے تفتیش مکمل کرنی ہے۔عدالتی فیصلے میں یہ بھی کہا کہ ملزم کی جانب سے سوشل میڈیا پر اپ لوڈ تمام مواد فرانزک لیب بھیجوا دیا گیا ہے۔

پراسکیوشن نے شاہ محمود قریشی کے 30 دن کے جسمانی ریمانڈ کی استدعا کی تھی۔

یاد رہے کہ لاہور پولیس نے اڈیالہ جیل میں قید پی ٹی آئی رہنما شاہ محمود قریشی کو 9 مئی کے 8 مقدمات میں گرفتار کرلیا تھا۔پولیس کے مطابق لاہور پولیس کی خصوصی ٹیم شاہ محمود قریشی کو گرفتار کرنے اڈیالہ جیل راولپنڈی پہنچی تھی جہاں تفتیشی ٹیم نے عدالت سے ملزم شاہ محمود قریشی کو لاہور منتقل کرنے کی اجازت مانگی تھی ۔تاہم عدالت نے سکیورٹی خدشات کے باعث شاہ محمود قریشی کو لاہور منتقل کرنے سے منع کر دیا تھا۔

لاہور پولیس کے مطابق تفتیشی ٹیم کی استدعا پر عدالت نے شاہ محمود قریشی کا تین روزہ جسمانی ریمانڈ منظور کرلیا تھا۔تفتیشی ٹیم نے شاہ محمود قریشی کا اڈیالہ جیل میں ہی بیان ریکارڈ کیاتھا۔ شاہ محمود قریشی ویڈیو لنک کے ذریعے انسداد دہشتگردی کی عدالت میں پیش کیاگیاتھا۔شاہ محمود کی گرفتاری پر اپنے ردعمل میں ترجمان تحریک انصاف نے کہا تھاکہ  پی ٹی آئی رہنماء کی کسی بھی مقدمے میں گرفتاری کا کوئی جواز نہیں۔جن مقدمات میں گرفتاری ڈالی گئی ہے ان میں عدالت نے انہیں ضمانت دے رکھی تھی۔