سینیٹر مشتاق احمد نے جماعت اسلامی کی رکنیت سے استعفی دے دیا

?️ 9 اکتوبر 2025

اسلام آباد (سچ خبریں) سینیٹر مشتاق احمد نے جماعت اسلامی کی رکنیت سے استعفی دے دیا ہے، ان کا کہنا ہے کہ انہوں نے 19 ستمبر کو گلوبل صمود فلوٹیلا پر سفر کے دوران اپنا استعفی تنظیم کو بھجوایا۔

سینیٹر مشتاق احمد نے اپنے بیان میں کہا کہ تنظیم کی اپنی حدود ہوتی ہیں اور بعض اوقات آپ کو آزادانہ طور پر کام کرنے کی ضرورت ہوتی ہے۔ ان کا کہنا تھا کہ وہ چاہتے ہیں کہ انسانی حقوق، جمہوریت اور آزاد میڈیا کے لیے کھل کر جدوجہد کریں۔

انہوں نے مزید کہا کہ وہ ڈاکٹر عافیہ صدیقی، فلسطین اور پاکستان کے فیڈریٹنگ یونٹس کے دستوری حقوق کے لیے بھی اپنی کوششیں جاری رکھنا چاہتے ہیں۔

واضح رہے کہ سینیٹر مشتاق احمد خان 2018 سے 2024 تک جماعت اسلامی کے ٹکٹ پر سینیٹر رہے۔ اس سے قبل وہ جماعت اسلامی خیبرپختونخوا کے صوبائی امیر اور 2000 سے 2002 تک اسلامی جمعیت طلبہ کے ناظم اعلیٰ کے عہدے پر بھی فائز رہے۔