سہیل آفریدی ایک بار پھر وفاق اور پنجاب حکومت پر برس پڑے

?️ 10 جنوری 2026

حیدرآباد (سچ خبریں) وزیراعلیٰ خیبر پختونخوا سہیل آفریدی ایک بار پھر بقایا جات کے معاملے پر وفاق اور پنجاب حکومت کے رویے پر برس پڑے۔

سندھ کے ضلع حیدر آباد میں میڈیا سے گفتگو میں سہیل آفریدی کا کہنا تھا کہ وفاق سے خیبر پختونخوا کو حقوق نہیں مل رہے، صوبے کے عوام کے ساتھ امتیازی سلوک ہو رہا ہے، پنجاب کی جعلی حکومت کا جو رویہ ہمارے ساتھ تھا وہ ہمارے دلوں پر نقش ہوچکا ہے، وہاں جلسہ ہر حال میں ہوگا۔

وزیراعلیٰ خیبر پختونخوا نے کہا کہ ہمارے مینڈیٹ پر ڈاکہ ڈالا گیا، وفاق میں ہماری حکومت تھی، وفاقی حکومت کسی اور کے اشاروں پر فیصلے کرتی ہے، یہاں قبائلی اضلاع سے پہلی مرتبہ وزیراعلیٰ آیا ہے جب کہ دیگر صوبوں کے وزیراعلیٰ کے لیے جہاز کھڑے رہتے ہیں۔

سہیل آفریدی کا کہنا تھا کہ دیگر وزیراعلیٰ کی تعریفوں کے پل باندھے جاتے ہیں، یہ اختلاف میری ذات کے ساتھ نہیں صوبے کے ساتھ ہے۔ اُنہوں نے مزید یہ بھی کہا کہ نیشنل فنانس کمیشن (این ایف سی) کا شیئر چاروں صوبوں میں تقسیم نہیں ہو رہا، قبائلی اضلاع کو مالی نہیں صرف انتظامی شیئر میں شامل کیا گیا۔