سندھ حکومت نے کراچی میں مزید سختی کرنے کا فیصلہ کیا

?️ 23 مئی 2021

کراچی(سچ خبریں) کراچی پریس کانفرنس کرتے ہوئے وزیراعلیٰ سندھ مراد علی شاہ نے کہا کہ کورونا وائرس کی پہلی لہر پر ہم نے کامیابی سے قابو پایا، اب کورونا کی تیسری لہر سے نمٹ رہے ہیں۔ انسداد کورونا ٹاسک فورس میں مختلف اداروں کے نمائندے ہوتے ہیں۔ ہمیں ٹاسک فورس نے سختی سے کہا ہے کہ احتیاط کریں انہوں نے کہا کہ کراچی میں کیسز کی شرح زیادہ ہے لہذا مزید سختی کرنی ہوگی۔

وزیراعلیٰ سندھ نے کہا کہ کراچی میں مثبت کیسز کی شرح 13 فیصد سے زیادہ ہے۔ ہم نے مزید سختی کرنی ہے، ایس او پیز میں نرمی نہیں کرسکتے۔ اسپتالوں میں دستیاب بیڈز تیزی کے ساتھ بھر رہے ہیں۔

مراد علی شاہ نے کہا کہ عید کے بعد مثبت کیسز کی شرح میں تیزی سے اضافہ ہوا۔ عید کے بعد ایک ہفتے میں کیسز کی شرح 8 فیصد ہے۔ رمضان سے قبل کورونا کیسز کی تعداد کم تھی۔

ان کا کہنا تھا کہ ان اور آؤٹ ڈور ڈائننگ پر پابندی رہے گی۔ دکانوں کو 8 کے بجائے 6 بجے بند کرنے کا فیصلہ کیا ہے۔ تمام اسکولز اور کالجز 2 ہفتے کے لیے بند رہیں گے۔ ٹرانسپورٹ 50 فیصد مسافروں کے ساتھ چلے گی۔

مراد علی شاہ نے کہا کہ فلسطین میں اسرائیلی دہشت گردی کی مذمت کرتا ہوں۔ سندھ اسمبلی نے اس حوالے سے قرارداد منظور کی ہے۔ حکومت اس معاملے میں اچھے طریقے سے کردار ادا کرسکتی ہے۔

وزیراعلیٰ سندھ نے کہا کہ پانی کی تقسیم 1991 کے معاہدے کے تحت ہونی چاہیے۔ ایک صوبے کو سر سبز اور دوسرے کو بنجر بنانے کی اجازت نہیں دیں گے۔