دسمبر 2021ء کے دوران پاکستان کی درآمدات 6 اعشاریہ 9 بلین امریکی ڈالر رہ گئیں

?️ 2 جنوری 2022

اسلام آباد (سچ خبریں)  تفصیلات کے مطابق وزیر اعظم عمران خان کے مشیر برائے تجارت عبدالرزاق داؤد نے کہا ہے کہ دسمبر 2021ء کے دوران پاکستان کی درآمدات 6 اعشاریہ 9 بلین امریکی ڈالر رہ گئیں ، یہ 1 بلین امریکی ڈالر کی کمی ہے کیوں کہ دسمبر 2021 کے لیے درآمدی تخمینہ 6 اعشاریہ 2 بلین امریکی ڈالر تھا جب کہ دسمبر 2021 کے دوران پاکستان کی برآمدات میں دسمبر 2020ء میں 2.366 امریکی ڈالر کے مقابلے میں 16.7 فیصد اضافہ ہوا اور اب برآمدات 2.761 بلین امریکی ڈالر ہوگئی ہیں ، دسمبر 2021 کے دوران برآمدات اور درآمدات کے زمرے کے بارے میں مزید تفصیلات جلد ہی شیئر کی جائیں گی جب ہم انہیں مرتب کریں گے۔

انہوں نے بتایا کہ رواں مالی سال کی پہلی ششماہی کے دوران برآمدات جولائی تا دسمبر 2020ء کے دوران 12.110 بلین امریکی ڈالر کے مقابلے میں 25 فیصد بڑھ کر 15.125 بلین امریکی ڈالر ہوگئیں جب کہ اس مالی سال کی پہلی ششماہی کے لیے برآمدات کا ہدف 15 بلین امریکی ڈالر تھا۔ علاوہ ازیں وزیرِاعظم عمران خان نے کہا ہے کہ پاکستان کے معاشی اشاریے اور زرمبادلہ کے ذخائر مستحکم ہوگئے ہیں، معاشی پالیسیاں باکل درست سمت میں جا رہی ہیں، معاشی ترقی گزشتہ سال سے بھی زیادہ ہونے کی توقع ہے، صنعتی پیداوار، برآمدات ویلیوایڈیشن اور ریونیو میں اضافہ ہوا ہے۔

اے آروائی کے مطابق وزیرِاعظم عمران خان کی زیرصدارت میکرواکنامک مشاورتی گروپ کا اجلاس ہوا، اجلاس میں وزیر اعطم عمران خان کو معاشی واقتصادی صورتحال پر بریفنگ میں بتایا گیا کہ کورونا وباء کی وجہ سے دنیا میں جب معیشتیں منفی اثرات سے متاثر ہو رہی تھیں، تو پاکستان میں حکومتی پالیسیوں کے باعث نہ صرف وبائی مرض سے نمٹنے کیلئے اچھے اقدامات کیے گئے، بلکہ حکومت نے شرح نمو کو بھی 3.9 فیصد تک برقرار رکھا۔

وزیراعظم عمران خان نے گفتگو کرتے ہوئے کہا کہ حکومت نے معاشی بحرانوں اور کورونا معاشی مشکلات کا بہترین مقابلہ کیا ، صنعتی پیداوار، برآمدات ویلیوایڈیشن اور ریونیو میں زبردست اضافہ ہوا ہے، معیشت اب پائیدار ترقی کی راہ پر گامزن ہوچکی ہے ، معاشی پالیسیاں باکل درست سمت میں جا رہی ہیں، معاشی ترقی گزشتہ سال سے بھی زیادہ ہونے کی توقع ہے۔