حکومت آئین کا حلیہ بگاڑ رہی، اصل شکل میں بحال کروائیں گے: حافظ نعیم

?️ 11 نومبر 2025

لاہور: (سچ خبریں) امیر جماعت اسلامی پاکستان حافظ نعیم الرحمن نے کہا ہے کہ موجودہ حکومت آئین کا حلیہ بگاڑ رہی ہے، ہم آئین پاکستان کو اصل شکل میں بحال کروا کر رہیں گے۔

امیر جماعت اسلامی حافظ نعیم الرحمن نے ایوان عدل لاہور میں وکلا سے خطاب کرتے ہوئے کہاکہ 26 ویں آئینی ترمیم کے وقت بھی ملاقاتیں ہوئیں، اس وقت بھی ہمارا موقف واضح تھا، ملاقاتیں ہورہی تھیں، آنی جانی لگی ہوئی تھی، ہم اس وقت بھی آئین کے ساتھ کھڑے ہوئے اور آج بھی آئین کے ساتھ کھڑے ہیں۔

حافظ نعیم الرحمن نے کہا کہ چیف جسٹس پاکستان کا عہدہ ختم کرکے چیف جسٹس سپریم کورٹ کردیا گیا، اب آئینی عدالت کا چیف جسٹس وزیراعظم لے کر آئیں گے جس کو وزیراعظم چاہیں گے وہ چیف جسٹس ہوں گے۔

امیر جماعت اسلامی نے مزید کہاکہ جوڈیشل کمیشن میں اکثریت حکومت کی ہے، پہلے جوڈیشل کمیشن میں ججز کی اکثریت تھی، آئین میں لکھا ہے حاکمیت اللہ تعالیٰ کی ہے، آئین اور اسلامی تعلیمات کے خلاف کسی شخص کو استثنیٰ نہیں دیا جاسکتا، کوئی کتنا بھی مضبوط کیوں نہ ہو اس کو استثنیٰ نہیں دینا چاہئے۔

انہوں نے کہا کہ شہباز شریف سٹاک ایکسچینج کے متعلق کہتے ہیں معیشت درست سمت جارہی ہے، سٹاک ایکسچینج کے مطابق کہتے ہیں معیشت بہتر ہورہی ہے ہمیں نظام کو بدلنا ہوگا اس کے لیے طول جہدوجہد کرنا ہوگی۔

امیر جماعت اسلامی حافظ نعیم الرحمن نے مزید کہاکہ ادھر سینیٹر پیسے والا بنتا ہے، پھر ان سینیٹرز کو خرید لیا جاتا ہے جب اسٹبلشمنٹ کا ہاتھ ہمارے سر پر آجائے تو زندہ باد، جب کسی دوسرے کے اوپر چلا جائے تو پھر مردہ باد ہوتا ہے۔

انہوں نے کہا کہ 2015 سے پنجاب میں بلدیاتی الیکشن نہیں ہوئے اب لوکل گورنمنٹ ایکٹ لے کر آئے ہیں جس کے مطابق غیر جماعتی الیکشن ہوں گے۔