جنگی صورتحال اور معاشی دباؤ: وزیراعلی پنجاب کے بڑے فیصلے، تعلیمی ادارے 31 مارچ تک بند

?️ 9 مارچ 2026

لاہور (سچ خبریں) وزیر اعلیٰ پنجاب مریم نواز نے خطے میں جاری جنگ کے باعث پیدا ہونے والی غیر معمولی معاشی صورتحال کے پیش نظر اہم اقدامات کا اعلان کر دیا۔

وزیر اعلیٰ پنجاب نے پیٹرولیم بحران کے خاتمے تک صوبائی وزراء کے لیے سرکاری فیول کی فراہمی بند کرنے کا فیصلہ کیا۔ جبکہ سرکاری افسران کی گاڑیوں کے لیے پٹرول اور ڈیزل الاونس میں فوری طور پر 50 فیصد کمی کر دی گئی۔ اس کے علاوہ صوبائی وزراء اور اعلیٰ سرکاری افسران کے ہمراہ چلنے والی پروٹوکول گاڑیوں پر بھی پابندی عائد کر دی گئی ہے۔ نئی ہدایات کے مطابق ناگزیر سیکیورٹی کے لیے صرف ایک گاڑی ہی صوبائی وزراء اور اعلیٰ افسران کے ساتھ ہوگی۔

پنجاب حکومت نے سرکاری دفاتر میں ورک فرام ہوم پالیسی بھی نافذ کرنے کا فیصلہ کیا۔ جس کے تحت صرف ضروری عملہ ہی دفاتر میں حاضر ہوگا۔ دوسری جانب تعلیمی اداروں کے حوالے سے بھی بڑا فیصلہ کیا گیا ہے۔ حکومت کے مطابق اسکول، کالج اور یونیورسٹیاں 10 مارچ سے 31 مارچ تک بند رہیں گی۔ تاہم امتحانات شیڈول کے مطابق منعقد ہوں گے۔

وزیر اعلیٰ پنجاب مریم نواز نے نجی سیکٹر کو ورک فرام ہوم، غیر ضروری تقریبات نہ کرنے اور صرف ضروری اسٹاف بلانے کی ہدایت کر دی۔ جبکہ ٹرانسپورٹ کرایوں کی سخت نگرانی اور خلاف ورزی کی صورت میں قانونی کارروائی کی ہدایت کر دی۔ انہوں نے کہا کہ صوبے بھر میں اشیائے خوردونوش کی طلب و رسد کی سخت نگرانی کی جائے۔

وزیر اعلیٰ پنجاب مریم نواز نے عوام سے بحرانی صورتحال کے پیش نظر آؤٹ ڈور فنکشن نہ کرنے کی اپیل کرتے ہوئے کہا کہ ہنگامی حالات کے پیش نظر عوام لیٹ نائٹ شاپنگ سے گریز کریں۔ اور ضروری اشیا کی غیر ضروری خریداری یا ذخیرہ نہ کریں۔