تمام ممالک کے ساتھ مل کر چلنا چاہتے ہیں: معید یوسف

🗓️ 25 فروری 2022

اسلام آباد (سچ خبریں)  مشیر برائے قومی سلامتی ڈاکٹر معید یوسف کا کہنا ہے کہ امریکا کے ساتھ تعلقات صرف اس بات پر قائم نہیں کہ فون کال ہوئی یا نہیں امریکا کے ساتھ تعلقات بہتر ہو رہے ہیں۔اگر تناؤ آئے گا تو ہم مفادات کو مدنظر رکھیں گ،تمام ممالک کو پاکستان کی اہمیت کا پتہ ہے۔ تمام ممالک کے ساتھ مل کر چلنا چاہتے ہیں۔

دنیا نیوز کی رپورٹ کے مطابق مشیر برائے قومی سلامتی ڈاکٹر معید یوسف نے کہا ہے کہ پاکستان کسی بلاک کا حصہ نہیں، امریکا کے ساتھ تعلقات صرف اس بات پر قائم نہیں کہ فون کال ہوئی یا نہیں، ہر سطح پر امریکا کے ساتھ روابط ہیں، رواں ہفتے میری امریکی حکام سے بات ہوئی۔

وزیر خارجہ کی بھی بات ہوتی رہتی ہے،آرمی چیف اور ملٹری ٹو ملٹری بھی رابطہ ہوتا ہے۔معید یوسف نے کہا کہ امریکا کے ساتھ تعلقات آگے چل رہے ہیں۔اگر تناؤ آئے گا تو ہم مفادات کو مدنظر رکھیں گے، پاکستان ایکسکلوسو  اتحادیوں کے خلاف ہے،امریکی انڈوپیسفک اسٹرٹیجی میں ہونا پاکستان کا حق ہے۔اگر پاکستان کو تنہا کیا گیا تو ہم کہہ سکتے ہیں کہ یہ ٹھیک نہیں ہے، پاکستان سب کے ساتھ مل کر چلنا چاہتا ہے۔

دوسری جانب وزیراعظم عمران خان نے روس کا دو روزہ دورہ مکمل کر لیا ہے۔ وزیر اعظم عمران خان نے روسی صدر ولادی میر پیوٹن سے جمعرات کو ون آن ون ملاقات کی جس میں میں معیشت ، تجارت اور توانائی کے شعبوں میں تعاون سمیت دوطرفہ تعلقات، علاقائی و بین الاقوامی امور پر تبادلہ خیال کیا۔ قبل ازیں روسی فیڈریشن کے ایگزیکٹو ہیڈکوارٹرز کریملن پہنچنے پر صدر پیوٹن نے وزیراعظم عمران خان پرتپاک استقبال کیا۔

وزیراعظم عمران خان اور روسی صدر نے دوطرفہ تعلقات کے تمام پہلوئوں ،دوطرفہ تجارت، معیشت اور توانائی بالخصوص پاکستان سٹریم گیس پائپ لائن منصوبہ میں تعاون اور علاقائی و بین الاقوامی امور پر بات چیت کی۔ یاد رہے کہ23 سال کے بعد کسی پاکستانی وزیر اعظم کا روس کا یہ پہلا دورہ ہے۔