بیرون ملک پھنسے پاکستانیوں کی واپسی کیلئے اقدامات شروع

?️ 5 جولائی 2021

اسلام آباد(سچ خبریں) غیر ملکی ایئرلائنز کی جانب سے پروازوں کی منسوخی کے بعد پی آئی اے کی جانب سے  بیرون ملک پھنسے پاکستانیوں کی واپسی کیلئے آج سے اقدامات شروع ہو جائیں گے۔ فلائٹ آپریشن چھ جولائی سے اٹھارہ جولائی تک مکمل کیا جائے گا۔

تفصیلات کے مطابق پی آئی اے کی جانب سے بیرون ملک پھنسے پاکستانیوں کی واپسی کیلئے آج سے آپریشن شروع ہوگا، ترجمان پی آئی اے کا کہنا ہے کہ دبئی، دوحہ اور بحرین سے پاکستان کے لیے اٹھارہ پروازیں آپریٹ ہوں گی، پروازیں گلف ممالک سےلاہور،اسلام آباد اورکراچی کے لیےآپریٹ کی جائیں گی۔

پی آئی اے فلائٹ آپریشن کیلئے بوئنگ ٹرپل سیون طیارےاستعمال کرے گا، گلف ممالک سے فلائٹ آپریشن چھ جولائی سے اٹھارہ جولائی تک مکمل کیا جائے گا۔وزیر ہوابازی غلام سرورخان کا کہنا ہے کہ اووربکنگ پرغیرملکی ایئرلائنزکوشوکازنوٹس جاری کردئیے ہیں اور اووربکنگ کرنےوالی ایئرلائنز کے خلاف کارروائی کی جارہی ہے۔

خیال رہے اے آر وائی نیوز نے بیرون ملک پھنسے پاکستانیوں کے لئے آواز اٹھائی تھی، جس کے بعد سول ایوی ایشن اتھارٹی نے ایکشن لیا تھا۔یاد رہے غیرملکی ائیرلائنز کی جانب سے پروازوں کی منسوخی کے بعد امریکا سمیت دیگر ممالک سے ‏‏آنیوالے ہزاروں پاکستانی مسافر پھنس گئے تھے۔

غیر ‏‏ملکی ایئرلائنز نے پاکستان کیلئے اوور بوکنگ کی گئی ، جس کے باعث ہزاروں پاکستانی مہنگے ٹکٹ خریدنے کے باوجود دیار غیر میں محصور ہیں۔بعد ازاں حکومتی ہدایت پر قومی ایئرلائن پی آئی اے نے بیرون ممالک ‏میں پھنسے پاکستانیوں کی مدد کا فیصلہ کیا تھا۔