اگر مریم صفدر کے  پاس فرح خان کے خلاف ثبوت ہیں تو وہ عدالت میں پیش کریں:فواد چوہدری

?️ 6 اپریل 2022

اسلام آباد (سچ خبریں ) پاکستان تحریک انصاف کے رہنماء فواد چوہدری نے کہا ہے کہ فرح خان ہماری پھوپھی کی بیٹی نہیں ، اگر مریم صفدر کے  پاس فرح خان کے خلاف ثبوت ہیں تو وہ عدالت میں پیش کریں۔ تفصیلات کے مطابق ہم نیوز کے ایک پروگرام میں فرح خان سے متعلق پوچھے گئے سوال کے جواب میں سابق وفاقی وزیر برائے اطلاعات و نشریات نے کہا کہ اگر اس حوالے سے مریم نواز کے پاس ثبوت ہیں تو وہ عدالتوں میں لے آئیں، عدالتیں کھلی ہیں ۔

ایک اور سوال کے جواب میں انہوں نے کہا کہ اپوزیشن کو پارلیمنٹ کی کمیٹی میں بلایا گیا تھا تو یہ کیوں نہیں آئے ، خالد مگسی نے کہا اگر کوئی خط ہے تو ہمیں دکھا دیں ، اس پر وزیراعظم نے فیصلہ کیا کہ سب کا حق ہے کہ وہ خط دیکھیں اور فیصلہ کریں لیکن شہبازشریف اور بلاول بھٹو نےاجلاس کا بائیکاٹ کر دیا۔

فواد چوہدری  نے کہا کہ شہبازشریف نے کہا تھا ہمیں اجلاس میں جانے کی ضرورت ہی نہیں ہے ، اس کا مطلب شہبازشریف کو پتہ تھا کون سے ثبوت ہیں؟ کیا کچھ ہے؟ اس لیے وہ نہیں آئے ، 31 مارچ کے اجلاس میں شہبازشریف نے کہا ہم خط کے معاملے پر بات نہیں کرنا چاہتے۔

ادھر حزب اختلاف کی جانب سے فرح خان کے حوالے سے الزامات پر عثمان بزدار کا موقف آگیا ، عبوری وزیراعلیٰ پنجاب نے کہا ہے کہ خاتون اول اور فرح خان کے بارے میں بے بنیاد الزامات کو قطعی طور پر مسترد کرتا ہوں ، پنجاب میں تقررو تبادلے میرٹ اور قواعد و ضوابط کے مطابق ہوتے ہیں۔ انہوں نے کہا کہ علیم خان ، چوہدری سرور اور دیگر اپوزیشن ارکان کے من گھڑت الزامات کی سختی سے تردید کرتا ہوں اور بلا ثبوت الزام تراشی کی مذمت کرتا ہوں۔