اپوزیشن کی تحریک عدم اعتماد کے خلاف حکومت کی حکمت عملی

?️ 17 فروری 2022

اسلام آباد (سچ خبریں)وفاقی حکومت نے اپوزیشن کی تحریک عدم اعتماد کے خلاف حکمت عملی طے کر لی ہے۔ اتحادی جماعتوں کے ارکان کو وزیر مملکت کا عہدہ دیا جائے گا،اتحادی جماعتوں سے کیے گئے تمام وعدے پورے کیے جائیں گے، اتحادی جماعتوں کے گلے شکوے اور تحفظات کو فوری طور پر دور کرنے کا فیصلہ کیا گیا۔

جیو ٹی وی کی رپورٹ کے مطابق حکومت نے تحریک عدم اعتماد کے خلاف حکمت عملی کے طور پر اتحادی جماعتوں کو خوش کرنے کا فیصلہ کیا ہے۔ذرائع کے مطابق اتحادی جماعتوں کے ارکان کو وزیر مملکت کا عہدہ دیا جائے گا اور اتحادی جماعتوں سے کیے گئے تمام وعدے پورے کیے جائیں گے۔

اتحادی جماعتوں کے گلے شکوے اور تحفظات کو فوری طور پر دور کرنے کا فیصلہ کیا گیا ہے اور اس حوالے سے وزیراعظم عمران خان نے قریبی رفقاء سے مشاورت مکمل کرلی ہے۔دوسری جانب پاکستان تحریک انصاف کے سینیٹر فیصل جاوید خان نے کہا کہ حزب اختلاف کا مسئلہ صرف مقصود چپڑاسی کا ہے اور حزب اختلاف کی جماعتیں صرف کرپشن چھپانے کے لیے اکھٹی ہوئی ہیں۔

نجی ٹی وی چینل ہم نیوز کے پروگرام میں بات کرتے ہوئے فیصل جاوید خان نے کہا کہ عدم اعتماد کی تحریک میں دیر نہ کریں آج ہی لے کر آئیں اور جس مطلوبہ نمبر کی حزب اختلاف کو تلاش ہے، عین وقت پر وہی نمبر غائب ہو گا۔ حزب اختلاف کی جماعتوں کو جو مطلوبہ نمبر درکار ہے وہ عارضی طور پر بند ہے۔ فیصل جاوید کا کہنا تھا کہ حزب اختلاف عمران خان کے خلاف منفی پراپیگنڈے کی مہم چلا رہی ہے لیکن عمران خان نے ملکی خزانے کو نقصان پہنچایا اور نہ ہی کرپشن کی۔

عمران خان کے پاس گھر کے کرائے کی ادائیگی کے لیے بھی رقم نہیں ہوا کرتی تھی۔اپوزیشن کی تحریک عدم اعتماد سے متعلق اُن کا کہنا تھا کہ تحریک عدم اعتماد ناکام ہو جائے گی اور اگر تحریک عدم اعتماد کامیاب بھی ہو جائے تو عمران خان زیادہ خطرناک ہوں گے۔

پاکستان صرف 30 دن کے لیے پانی کا ذخیرہ رکھتا ہے اور ڈیمز پاکستان کے لیے انتہائی اہم ہیں۔ 10 سال 10 ڈیمز عمران خان کا وژن ہے۔ پی ٹی آئی کے سینیٹر فیصل جاوید نے کہا کہ کالا باغ ڈیم بہت ضروری ہے جس کے لیے سندھ حکومت اور لوگوں کو قائل کرنا ہو گا۔ 2025ء کے بعد پانی کی قلت زیادہ ہو جائے گی۔