انٹربینک میں ڈالر ایک روپے 47 پیسے مزید سستا

?️ 10 اکتوبر 2022

اسلام آباد:(سچ خبریں) ڈالر کے مقابلے روپے کی قدر میں مسلسل اضافے کا سلسلہ جاری ہے اور انٹربینک میں ڈالر مزید ایک روپے 47 پیسے سستا ہوگیا ہے۔

فاریکس ایسوسی ایشن آف پاکستان کے مطابق جمعہ کو 119 روپے 92 پیسے پر بند ہونے کے بعد آج صبح 9 بجکر 50 منٹ پر ڈالر 218 روپے 45 پیسے پر ٹریڈ کر رہا تھا جوکہ روپے کی قدر میں ایک روپے 47 پیسے یا 0.67 پیسے اضافہ ظاہر کرتا ہے۔ فاریکس ایسوسی ایشن کے چیئرمین ملک بوستان نے کہا کہ درآمدات میں کمی اور برآمد کنندگان کی جانب سے برآمدی زرمبادلہ ملک میں تیزی لانے سے ڈالر کی طلب کم ہو رہی ہے۔

ملک بوستان نے آئندہ دنوں میں شرح سود مستحکم رہنے یا کم ہونے کی امید ظاہر کرتے ہوئے کہا کہ توقع ہے کہ مستقبل میں روپے کی قدر مزید مستحکم ہوگی۔ دوسری جانب اسٹیٹ بینک آف پاکستان کی جانب سے نئی مانیٹری پالیسی کا اعلان آج کیا جائے گا۔

رواں سال اگست میں اسٹیٹ بینک آف پاکستان کے نئے گورنر جمیل احمد اور پاکستان کے نئے وزیر خزانہ اسحٰق ڈار کے عہدہ سنبھالنے کے بعد یہ پہلی مانیٹری پالیسی ہوگی۔  مالیاتی شعبے نے ملک میں مہنگائی کے پیش نظر شرح سود میں کسی تبدیلی کی امید ظاہر نہیں کی ہے۔