اسلام آباد ہائیکورٹ: وکلا کوعمران خان سے ملنے کی اجازت، اڈیالہ جیل کے سپرنٹنڈنٹ کو شوکاز نوٹس جاری

?️ 19 اکتوبر 2023

اسلام آباد:(سچ خبریں) اسلام آباد ہائی کورٹ نے پاکستان تحریک انصاف (پی ٹی آئی) کے چیئرمین عمران خان کو جیل میں سہولیات کی فراہمی سے متعلق درخواست پر سپرنٹنڈنٹ اڈیالہ جیل کو نوٹس کے باوجود پیش نہ ہونے پر شوکاز نوٹس جاری کرتے ہوئے وکلا کو بلاروک ٹوک سابق وزیراعظم سے ملاقات کی اجازت دینے کا حکم دے دیا۔

اسلام آباد ہائی کورٹ کے جسٹس میاں گل حسن اورنگزیب اور جسٹس ارباب طاہر پر مشتمل دو رکنی بینچ نے چیئرمین پی ٹی آئی عمران خان کو جیل میں سہولیات کی فراہمی کے لیے دائر درخواستوں پر سماعت کی جہاں سرکاری وکلا اور افسران دیر سے عدالت پہنچے۔

عدالت نے افسران پر اظہار برہمی کرتے ہوئے کہا کہ’کیوں نہ جیل سپرنٹنڈنٹ کے خلاف توہین عدالت کی کاروائی شروع کی جائے’۔

ڈپٹی اٹارنی جنرل ارشد محمود کیانی اور عظمت بشیر تارڑ تاخیر سے عدالت پہنچے تو عدالت کا کہنا تھا کہ’ ہر کوئی نواز شریف کے آنے کی خوشیاں منا رہا ہے مٹھایاں بانٹ رہا ہے، اس عدالت کی معاونت کے لیے کون آئے گا۔

عدالت نے کہا کہ آپ سب کو نواز شریف کی پڑی ہے، کیا ان کے استقبال کے لیے جانا ہے’؟۔

اپیل کی سماعت کے دوران چئیرمین پی ٹی آئی کے وکیل شیر افضل مروت نے عدالت کو بتایا کہ’ ہم چیئرمین پی ٹی آئی سے صرف اس دن ملاقات کر پاتے ہیں ، جس دن سماعت ہوتی ہے اور اس دن بھی ملاقات ڈبے نما پنجرے میں ہوتی۔

شیرافضل مروت نے کہا کہ ہم نے ایک شیڈول بنایا ہے جس کے تحت ہمیں ملاقات کی اجازت دی جائے’۔

جسٹس میاں گل حسن نے عمران خان کے وکیل سے کہا کہ ’شیڈول ہمیں دکھا دیں، آخر کار عمران خان سابق وزیر اعظم ہیں‘۔

جسٹس میاں گل حسن اورنگزیب نے کہا کہ 1977میں میرے والد بھی جیل میں تھے اور میں بھی ان سے جیل ملنے جاتا رہا ہوں’۔

چیئرمین پی ٹی آئی کے وکلا کی درخواست پر عدالت نے بغیر کسی رکاوٹ کے وکلا کو عمران خان سے ملاقات کی اجازت دے دی۔