آپریشن ضرب عضب اور ردالفساد سے دہشتگردوں کے عزائم کو شکست دی۔ وزیراعظم شہباز شریف

?️ 21 اگست 2025

اسلام آباد (سچ خبریں) وزیراعظم شہباز شریف نے کہا ہے کہ آپریشن ضرب عضب اور ردالفساد سے دہشت گردوں کے عزائم کو شکست دی۔

دہشت گردی سے متاثرہ افراد کو خراج تحسین پیش کرنے کے عالمی دن پر اپنے پیغام میں انہوں نے کہا کہ پاکستان آج دنیا کے ساتھ ہم آواز ہو کر دہشت گردی کے شکار اور متاثرین سے اظہار یکجہتی کرتا ہے۔ وزیر اعظم کا کہنا تھا کہ دہشت گردی کے متاثرین سے اظہار یکجہتی پاکستان کے پُرخلوص قومی جذبات کی عکاس ہے، پاکستان کے ہر عمر کے شہری، مسلح افواج، قانون نافذ کرنے والے اداروں نے دہشت گردی سے جنگ کی۔ انہوں نے کہا کہ پاکستان نے دہشت گردی کے خلاف عالمی جنگ میں ہر اول دستے کا کردار ادا کیا اور دہشت گردی کے ناسور کو بہادری، عزم و ہمت اور قربانیاں دے کر شکست دی۔

ان کا کہنا تھا کہ دہشت گرد اور دہشت گردی کے واقعات ہماری قومی غیرت و حمیت، امن و خوشحالی کے عزم کو پسپا نہیں کر سکے، پاکستان نے دہشت گردی کی جنگ میں 90 ہزار قیمتی جانوں کا نذرانہ پیش کیا، ہماری ملکی معیشت کو بھی خاطر خواہ نقصان اٹھانا پڑا۔ پاکستان کا ہر شہر، ہر بستی، شاہراہ، بازار، اسکول دہشت گردی اور متاثرین کی روداد سناتی ہیں، جہاں پاکستانی معاشرہ قربانیوں اورمصائب پر افسردہ ہے، وہیں اپنی بہادری پر فخر سے سر بلند بھی ہے، نوجوان نسل اس عزم کے ساتھ پروان چڑھ رہی ہے کہ ملکی سلامتی کی حفاظت ہر شہری کا فرض ہے۔

شہباز شریف نے کہا کہ وفاقی حکومت اور صوبائی حکومتیں دہشت گردی کو ختم کرنے کے لیے کوشاں ہیں، قانون نافذ کرنے والے ادارے اور انٹیلی جنس ادارے دہشت گردی کے خاتمے کے لیے کوشاں ہیں۔ سول اور ملٹری انٹیلی جنس اداروں نے ملک عزیز کو بےشمار دہشت گردی کے واقعات سے بچایا ہے۔