آئی فونز 16 کی قیمتیں جان کر دنگ رہ جائیں گے

?️ 10 ستمبر 2024

سچ خبریں: اسمارٹ فون بنانے والی امریکی کمپنی ایپل کی جانب سے جلد ہی آئی فون 16 کے مختلف فونز متعارف کرائے جائیں گے، جنہیں کمپنی کےاب تک کے بہترین فون قرار دیا جا رہا ہے۔

اس بار کمپنی آئی فون 16، آئی فون 16 پلس، آئی فون 16 پرو اور آئی فون 16 پرو میکس متعارف کرائے گی۔

اب تک سامنے آنے والی اطلاعات کے مطابق آئی فون 16 کو 6.1 انچ، آئی فون 16 پلس کو 6.7 انچ، آئی فون 16 پرو کو 6.3 انچ جبکہ آئی فون 16 پرو میکس کو 6.9 انچ اسکرین کے ساتھ پیش کیا جائے گا۔

اس بار کمپنی کی جانب سے بہترین فونز آئی فون 16 پرو اور آئی فون 16 پرو پلس ہوں گے، جن میں بہترین کیمرا فیچرز سمیت دیگر نئے فیچرز بھی دیے جائیں گے۔

جہاں اس بار کمپنی تمام فونز کو آرٹیفیشل انٹیلی جنس (اے آئی) ٹولز اور فیچرز کے ساتھ پیش کرے گی، وہیں اس بار کیمرا ٹیکنالوجی کو بھی اپگریڈ کیا جائے گا۔

اسی طرح اس بار فونز کے اسکرین سائز سمیت چارجرز کو بھی طاقتور پاور میں پیش کیا جائے گا۔

تاہم ساتھ ہی یہ بھی خیال کیا جا رہا ہے کہ اس بار آئی فونز ماضی کے مقابلے بہت زیادہ مہنگے ہوں گے، چوں کہ دنیا بھر میں امریکی ڈالرز کے دام بڑھ چکے ہیں۔

اگرچہ ایپل کی جانب سے فونز کی قیمت گزشتہ سال جتنی ہی رکھے جانے کا امکان ہے، تاہم ڈالرز کے ایکسچینج ریٹ کی وجہ سے فونز کی قیمت دنیا بھر اور خصوصی طور پر پاکستان میں بہت زیادہ بڑھ جائے گی۔

پاکستان میں آئی فونز پر فیڈرل بورڈ آف روینیو (ایف بی آر) اور پاکستان ٹیلی کمیونی کیشن اتھارٹی (پی ٹی اے) کے ٹیکسز لگنے کے بعد ان میں مزید سوا لاکھ سے پونے دو لاکھ روپے تک اضافہ ہوسکتا ہے۔

اس بار آئی فون کا سستا ترین فون 799 امریکی ڈالر یعنی پاکستانی 2 لاکھ 22 ہزار روپے جب کہ سب سے مہنگا فون 1599 امریکی ڈالر یعنی پاکستانی 4 لاکھ 45 ہزار روپے سے زائد کا ہوگا۔

اسی طرح کمپنی کے تینوں فونز کے مختلف میموری ماڈیولز کی قیمت الگ الگ ہوگی اور ہر فون پر قیمت کے حساب سے ٹیکس نافذ ہوگا۔

پاکستان میں آئی فون کا سب سے سستا فون ہر طرح کے ٹیکسز لگنے کے بعد 3 لاکھ روپے تک جب کہ سے مہنگا فون تقریبا 6 لاکھ روپے تک دستیاب ہوگا۔

پاکستان میں آئی فون کا سستا ترین فون ڈھائی لاکھ روپے سے کم کسی صورت میں دستیاب نہیں ہوگا جب کہ مہنگا ترین فون ساڑھے پانچ لاکھ تک بمشکل دستیاب ہوگا۔