فلسیطنی ڈاکٹروں پر صہیونی مظالم میں اضافہ؛ کمال عدوان کے سربراہ

?️ 6 جون 2026

سچ خبریں:غاصب صہیونی حکام نے غزہ کے کمال عدوان اسپتال کے سربراہ ڈاکٹر حسام ابو صفیہ کے خلاف تشدد اور دباؤ میں مزید اضافہ کرتے ہوئے انہیں النفحہ جیل کی کال کوٹھڑی میں منتقل کر دیا ہے۔

غزہ کے کمال عدوان اسپتال کے سربراہ ڈاکٹر حسام ابو صفیہ کو صہیونی حکام نے سخت حالات میں النقب جیل سے النفحہ جیل کی تنہائی کی کوٹھڑی میں منتقل کر دیا۔ وکیل کے مطابق فلسطینی ڈاکٹر مسلسل تشدد، طبی غفلت اور غیر قانونی حراست کا سامنا کر رہے ہیں۔

کمال عدوان اسپتال کے ڈائریکٹر ڈاکٹر حسام ابو صفیہ کی بلا جواز اور غیر قانونی گرفتاری کو ایک سال سے زائد عرصہ گزر چکا ہے۔ وہ وہی فلسطینی معالج ہیں جنہوں نے اپنی جان بچانے کے بجائے اپنے مریضوں کے ساتھ رہنے کو ترجیح دی تھی۔ ان کے وکیل نے اب ان کی غیر انسانی قید سے متعلق نئی تفصیلات جاری کی ہیں۔

ڈاکٹر حسام ابو صفیہ کے وکیل ناصر عودہ نے بتایا کہ صہیونی جیل حکام نے انہیں سخت حراستی حالات، علاج معالجے اور ضروری طبی سہولیات سے محرومی کی حالت میں النقب جیل سے صحرائی النفحہ جیل کی تنہائی کی کوٹھڑی میں منتقل کر دیا ہے۔

انہوں نے کہا کہ کمال عدوان اسپتال کے سربراہ کی منتقلی اور تنہائی میں رکھنے کا فیصلہ دراصل ان کی مسلسل حراست کے خلاف دائر اپیل کے بعد ایک براہِ راست تادیبی اقدام ہے۔ ان کے مطابق ڈاکٹر ابو صفیہ کو صہیونی خفیہ اداروں اور جیل انتظامیہ کی جانب سے مختلف دھمکیوں اور دباؤ کا سامنا ہے۔

وکیل نے وضاحت کی کہ یہ تمام اقدامات اس مقصد کے تحت کیے جا رہے ہیں تاکہ ڈاکٹر حسام ابو صفیہ جیلوں میں اپنے ساتھ ہونے والے سلوک اور دیگر فلسطینی قیدیوں کی صورتحال کو دنیا کے سامنے نہ لا سکیں۔ تنہائی کی کوٹھڑی میں رکھنے کا مقصد انہیں دیگر قیدیوں، اپنے وکیل اور بیرونی دنیا سے مکمل طور پر الگ کرنا ہے۔ انہوں نے بتایا کہ متعدد مرتبہ وکلاء کو بغیر کسی واضح قانونی جواز کے ان سے ملاقات کی اجازت بھی نہیں دی گئی۔

ناصر عودہ نے بتایا کہ ڈاکٹر حسام ابو صفیہ اپنی ڈیڑھ سالہ قید کے دوران نہ صرف وکیل سے رابطے کی پابندیوں کا شکار رہے بلکہ انہیں منظم بدسلوکی، سخت حراستی حالات، مسلسل طبی غفلت اور علاج سے محرومی کا بھی سامنا کرنا پڑا۔

ان کا کہنا تھا کہ ڈاکٹر حسام ابو صفیہ اب بھی نام نہاد غیر قانونی جنگجوؤں کے قانون کے تحت بغیر کسی واضح الزام یا ثبوت کے زیر حراست ہیں۔ انہوں نے کہا کہ ابو صفیہ کا معاملہ ایک وسیع تر پالیسی کا حصہ ہے جس کے تحت فلسطینی طبی عملے کو نشانہ بنایا جا رہا ہے۔ ان کے مطابق غزہ کے اسپتالوں سے کم از کم 14 فلسطینی ڈاکٹروں کو گرفتار کیا جا چکا ہے، جو غزہ کے صحت کے شعبے اور اس کے کارکنوں کے خلاف صہیونی پالیسی کا حصہ ہے۔

فلسطینی وکیل نے مزید کہا کہ آئندہ دنوں میں ڈاکٹر حسام ابو صفیہ کی عدالتی سماعت متوقع تھی، تاہم انہیں اچانک النفحہ جیل منتقل کر کے تنہائی کی کوٹھڑی میں ڈالنے کے فیصلے نے سب کو حیران کر دیا۔

انہوں نے ڈاکٹر ابو صفیہ کی جسمانی اور نفسیاتی حالت پر شدید تشویش ظاہر کرتے ہوئے بتایا کہ ان کا وزن نمایاں حد تک کم ہو چکا ہے۔ ان کے مطابق ڈاکٹر ابو صفیہ ان 737 طبی کارکنوں میں شامل ہیں جنہیں غزہ کے خلاف جنگ شروع ہونے کے بعد اسرائیل نے گرفتار کیا ہے۔

28 دسمبر 2024 کو غزہ کی وزارت صحت نے اعلان کیا تھا کہ صیہونی فوج نے شمالی غزہ کے کمال عدوان اسپتال کے سربراہ ڈاکٹر حسام ابو صفیہ کو گرفتار کر لیا ہے۔

اس سے ایک روز قبل قابض فوج نے کمال عدوان اسپتال پر دھاوا بول کر اسے آگ لگا دی تھی اور اسپتال کو خدمات کی فراہمی سے مکمل طور پر خارج کر دیا تھا۔ اس حملے کے دوران ڈاکٹر ابو صفیہ سمیت 350 سے زائد افراد کو گرفتار کیا گیا۔

گرفتاری سے قبل جاری ہونے والی آخری تصویر میں ڈاکٹر حسام ابو صفیہ سفید طبی لباس میں اسپتال کے ملبے کے درمیان صیہونی ٹینکوں کی طرف جاتے ہوئے دکھائی دیے تھے۔

شمالی غزہ اور خصوصاً کمال عدوان اسپتال کے خلاف صہیونی جرائم کے دوران ڈاکٹر حسام ابو صفیہ کا نام دنیا بھر میں نمایاں ہوا۔ انہوں نے انتہائی دشوار حالات کے باوجود، حتیٰ کہ اپنے بیٹے کی شہادت کے بعد بھی، آخری لمحے تک زخمیوں اور مریضوں کی خدمت جاری رکھی۔

فلسطینی عوام انہیں ایک ایسے معالج کے طور پر یاد کرتے ہیں جس نے بارہا عالمی برادری سے غزہ کے صحت کے نظام کو بچانے اور زخمیوں و مریضوں کی مدد کے لیے عملی اقدامات کا مطالبہ کیا، مگر ان کی اپیلوں پر کوئی مؤثر جواب نہیں ملا۔ اس کے باوجود انہوں نے پانی، خوراک اور بنیادی ضروریات کی شدید قلت کے باوجود اپنی خدمات جاری رکھیں۔

گرفتاری سے قبل ان کی آخری تصویر نے سماجی رابطوں کی ویب سائٹس پر وسیع ردعمل پیدا کیا۔ بہت سے صارفین نے اس تصویر کو غزہ کی موجودہ صورتحال کی علامت قرار دیتے ہوئے لکھا: تنہا، بالکل غزہ کی طرح۔