ٹرمپ کو خوف تھا کہ وینزویلا آپریشن کا انجام ایران کے صحرائے طبس جیسا نہ ہو

?️ 8 جنوری 2026

ٹرمپ کو خوف تھا تھا کہ وینزویلا آپریشن کا انجام ایران کے صحرائے طبس جیسا نہ ہو

امریکی اخبار نیویارک ٹائمز نے صدر ڈونالڈ ٹرمپ کے حوالے سے لکھا ہے کہ وہ وینزویلا میں امریکی فوجی کارروائی کے ایران میں پیش آنے والی کارٹر دور کی تباہ کن ناکامی جیسی صورتِ حال میں بدل جانے سے خوفزدہ تھے۔

جمعرات کو ایرنا نے نیویارک ٹائمز کی رپورٹ کے حوالے سے بتایا کہ ٹرمپ نے اس اخبار کو دیے گئے انٹرویو میں اعتراف کیا کہ انہیں خدشہ تھا کہ وینزویلا کے خلاف فوجی کارروائی 1980 کی اس ناکام امریکی مہم جیسی نہ بن جائے جو ایران کے صحرائے طبس میں انجام دی گئی تھی۔ یہ وہ آپریشن تھا جس کا مقصد تہران میں امریکی سفارت خانے کے 52 یرغمالیوں کو آزاد کرانا تھا، مگر ریت کے طوفان اور امریکی فوجی ہیلی کاپٹروں کی تباہی کے باعث یہ مشن ناکام ہو گیا تھا۔

ٹرمپ نے کہا کہ یہ ناکام کارروائی ’’جمی کارٹر کی پوری حکومت کو تباہ کر گئی‘‘۔ جمی کارٹر امریکہ کے 39ویں صدر تھے۔

امریکی صدر نے مزید کہا کہ واشنگٹن کو توقع ہے کہ وہ کئی برسوں تک وینزویلا کا انتظام سنبھالے گا اور اس ملک کے وسیع تیل کے ذخائر سے فائدہ اٹھائے گا۔

ان کا دعویٰ تھا کہ وینزویلا کی عبوری حکومت ’’وہ سب کچھ ہمیں فراہم کرے گی جو ہم ضروری سمجھتے ہیں‘‘۔

تقریباً دو گھنٹے طویل انٹرویو میں ٹرمپ نے کہا: ’’ہم وینزویلا کو ایک انتہائی منافع بخش طریقے سے دوبارہ تعمیر کریں گے، اس کے تیل سے فائدہ اٹھائیں گے، تیل نکالیں گے، عالمی منڈی میں تیل کی قیمتیں کم کریں گے اور وینزویلا کو، جسے اس کی شدید ضرورت ہے، پیسہ دیں گے۔‘‘

یہ بیانات ایسے وقت میں سامنے آئے ہیں جب ہفتے کی صبح (3 جنوری / 13 دی 1404) امریکی افواج نے وینزویلا کی سرزمین پر حملے کیے، جن کے بعد ٹرمپ نے دعویٰ کیا کہ وینزویلا کے صدر نکولس مادورو اور ان کی اہلیہ سیلیا فلورس کو حراست میں لے لیا گیا ہے۔

بعد ازاں وینزویلا کی آئینی سپریم کورٹ نے حکم دیا کہ رودریگس ملک کی عبوری صدارت سنبھالیں گے۔

اسی تناظر میں امریکی اخبار وال اسٹریٹ جرنل نے بھی رپورٹ کیا ہے کہ صدر ٹرمپ اور ان کے مشیر وینزویلا کی سرکاری تیل کمپنی (PDVSA) پر کنٹرول حاصل کرنے کے لیے ایک منصوبہ تیار کر رہے ہیں، جس کا مقصد آئندہ برسوں میں وینزویلا کی تیل کی صنعت پر تسلط اور عالمی منڈی میں تیل کی قیمت 50 ڈالر فی بیرل تک لانا ہے۔