ہم ایک بار پھر تباہی کے دہانے پر پہنچ چکے ہیں:صیہونی صدر

?️ 4 نومبر 2025

سچ خبریں:صیہونی صدر اسحاق ہرتزوگ نے تسلیم کیا کہ اسرائیل اندرونی نفرت، تشدد اور سیاسی انتشار کے باعث ایک بار پھر تباہی کے دہانے پر ہے۔

فلسطینی خبر رساں ایجنسی معا کی رپورٹ کے مطابق صیہونی صدر اسحاق ہرتزوگ نے تسلیم کیا ہے کہ اسرائیل ایک بار پھر تباہی کے دہانے پر پہنچ چکا ہے، جہاں داخلی تشدد، نفرت اور سیاسی تقسیم خطرناک حد تک بڑھ چکی ہے، ان کا کہنا ہے کہ موجودہ حالات 30 سال قبل اسحاق رابین کے قتل کے دور کی یاد دلاتے ہیں۔

یہ بھی پڑھیں: صیہونی اپنی تباہی کی طرف گامزن:نصراللہ

رپورٹ کے مطابق ہرتزوگ نے کہا کہ اسحاق رابین، سابق صہیونی وزیراعظم کے قتل کو تین دہائیاں گزرنے کے باوجود وہی نشانیاں دوبارہ ظاہر ہو رہی ہیں جو اُس وقت اسرائیل کو تباہی کی طرف لے جا رہی تھیں۔

انہوں نے خبردار کیا کہ آج بھی وہی زہریلی اور گستاخانہ زبان، غداری کے الزامات، نفرت اور تشدد کی فضا سڑکوں اور سوشل میڈیا پر پھیل چکی ہے، جو ریاست کے لیے ایک اسٹریٹجک خطرہ بن چکی ہے۔

ہرتزوگ نے مزید کہا کہ تین دہائیوں بعد بھی صیہونی معاشرہ اندرونی اختلافات اور نفرت کے زہر سے آزاد نہیں ہو سکا ہے، اگر ہوشیاری نہ برتی گئی تو اسرائیل خود اپنے ہاتھوں تباہ ہو جائے گا۔

مزید پڑھیں: اسرائیل تباہی کی راہ پر گامزن:عطوان

ان کا یہ بیان اُس وقت سامنے آیا ہے جب صہیونی حکومت شدید اندرونی خلفشار، بڑے مالیاتی بدعنوانی کے اسکینڈل، اور انتخابی سیاست میں بڑھتی کشمکش سے دوچار ہے۔