ٹرمپ کا دورہ مشرق وسطیٰ ایران-امریکہ مذاکرات میں رکاوٹ بن سکتا ہے:امریکی ایلچی

سچ خبریں:امریکی ایلچی اسٹیو ویٹکاف نے کہا ہے کہ ایران کے ساتھ چوتھے دور کے مذاکرات اگر نہ ہو سکے تو اس کی وجہ صدر ٹرمپ کا دورۂ مشرق وسطیٰ ہوگا، جب کہ مذاکرات مثبت انداز میں جاری تھے۔

آکسیوس نیوز ویب سائٹ کے مطابق، مشرق وسطیٰ کے لیے صدر ٹرمپ کے خصوصی ایلچی اور ایران کے ساتھ مذاکرات کے اعلیٰ امریکی نمائندے اسٹیو ویتکاف نے کہا ہے کہ اگر ایران کے ساتھ چوتھا دور نہ ہو سکا، تو اس کی بڑی وجہ  ٹرمپ کا مجوزہ دورۂ مشرق وسطیٰ ہوگا۔

یہ بھی پڑھیں:ایران نے امریکہ کو بالواسطہ مذاکرات کی تجویز کیوں دی؟

ویٹکاف نے مزید کہا کہ ایران کے ساتھ ہونے والے مذاکرات مثبت رہے ہیں اور کچھ پیشرفت بھی حاصل ہوئی ہے،ہم چاہتے ہیں کہ ایران کا جوہری مسئلہ سفارتی طریقے سے حل ہو، اور صدر ٹرمپ اسی پالیسی کے حامی ہیں،انہوں نے بتایا کہ امریکہ ان مذاکرات کو کامیاب بنانے کے لیے تمام تر کوششیں کر رہا ہے۔

ویٹکاف نے امید ظاہر کی کہ صدر ٹرمپ کے دورے سے پہلے یا اس کے دوران اسرائیلی قیدیوں کی رہائی کے حوالے سے کوئی معاہدہ ممکن ہو سکتا ہے،میں روزانہ قطر، مصر اور اسرائیل سے رابطے میں ہوں اور امید ہے کہ پیش رفت ہوگی۔

ان کا کہنا تھا کہ صدر ٹرمپ اور اسرائیلی وزیر اعظم نیتن یاہو دونوں ہی قیدیوں کی واپسی کے خواہاں ہیں، اور اس مقصد کے لیے وہ مکمل ہم آہنگی سے کام کر رہے ہیں۔

اپنی گفتگو کے آخر میں ویتکاف نے اسرائیل کی حمایت کا اعادہ کرتے ہوئے کہا کہ اسرائیل اپنے فیصلے آزادانہ طور پر لیتا ہے اور ٹرمپ ان فیصلوں کی مکمل حمایت کرتے ہیں۔

مزید پڑھیں:ایران امریکہ مذاکرات؛ 4 چیزوں پر ٹرمپ کا اتفاق

یہ بیانات اس وقت سامنے آئے ہیں جب صدر ٹرمپ نے اپنی مشرق وسطیٰ کی اگلی سفارتی مہم کا اعلان کیا ہے، جس میں ان کے مطابق وہ اگلے ہفتے سعودی عرب، امارات اور قطر کا دورہ کریں گے۔