ٹرمپ کے کام ڈکٹیٹروں جیسے ہیں:کیلیفورنیا کے گورنر 

سچ خبریں:کیلیفورنیا کے گورنر گاوین نیوسام نے ڈونلڈ ٹرمپ کے لاس اینجلس میں اقدامات کو شدید تنقید کا نشانہ بناتے ہوئے کہا ہے کہ شہریوں کی گرفتاری، شہروں کی عسکریت اور افراتفری پھیلانا ایک آمرانہ طرزعمل ہے۔

الجزیرہ نیوز چینل کی رپورٹ کے مطابق کیلیفورنیا کے گورنر گاوین نیوسام نے ڈونلڈ ٹرمپ کی جانب سے لاس اینجلس میں کیے گئے اقدامات پر شدید ردعمل کا اظہار کیا ہے۔

یہ بھی پڑھیں:نیویارک میں ٹرمپ ٹاور کے سامنے ٹرمپ کے خلاف احتجاج

رپورٹ کے مطابق امریکی صدر ڈونلڈ ٹرمپ کی طرف سے امیگریشن مخالف پالیسیوں کے خلاف احتجاجات کو دبانے کے لیے نیشنل گارڈز کی تعیناتی کے فیصلے پر وسیع پیمانے پر تنقید کی جا رہی ہے۔

اس حوالے سے گاوین نیوسام نے سوشل میڈیا پلیٹ فارم ایکس پر لکھا کہ تشدد پر اکسانا، منظم انتشار پیدا کرنا، شہروں کو فوجی اڈہ بنانا، اور مخالفین کی گرفتاری ،یہ ایک صدر کے نہیں بلکہ ایک آمر کے اقدامات ہیں!

اسی دوران، ایف بی آئی کا لاس اینجلس دفتر ایک ایسے شخص کی تلاش میں ہے جس پر ایک وفاقی اہلکار پر حملہ کرنے اور سرکاری املاک کو نقصان پہنچانے کا الزام ہے۔

ایف بی آئی نے اعلان کیا ہے کہ اس فرد کی شناخت اور گرفتاری میں مدد دینے والے کو 50 ہزار ڈالر انعام دیا جائے گا۔ حکام کا کہنا ہے کہ یہ کیس ان کی اولین ترجیحات میں شامل ہے اور وہ عوام کے تعاون کا خیرمقدم کرتے ہیں۔

ادھر، لاس اینجلس کی میئر کارن بس نے شہریوں کو تنبیہ کی ہے کہ کسی بھی قسم کی پرتشدد کارروائی یا سرکاری املاک کو نقصان پہنچانے کے خلاف سخت اقدامات کیے جائیں گے۔

کارن بس نے سوشل میڈیا پر بیان دیتے ہوئے کہا کہ ہم لاس اینجلس کے شہریوں کے پرامن اور قانونی احتجاج کے آئینی حق کا تحفظ کرتے ہیں لیکن تشدد اور تخریب کسی صورت برداشت نہیں کی جائے گی، اور اس میں ملوث افراد کو مکمل طور پر جواب دہ بنایا جائے گا۔

مزید پڑھیں:لاس اینجلس میں ٹرمپ حکومت کے خلاف احتجاج میں درجنوں افراد گرفتار

میئر نے شہریوں سے مطالبہ کیا کہ وہ اپنے قانونی حق کو استعمال کرتے ہوئے پرامن طریقے سے احتجاج کریں اور دوسرے شہریوں کے حقوق و امن عامہ کا خیال رکھیں۔