ٹرمپ نے بن سلمان کی یمن پر حملے کی درخواست مسترد کردی؛ سعودی ولی عہد کو 2 بار انکار

?️ 11 ستمبر 2026

سچ خبریں:ایکسیوس کے مطابق سعودی ولی عہد محمد بن سلمان نے ٹرمپ سے یمنی مجاہدین کے ٹھکانوں پر حملے کی درخواست کی، تاہم امریکی صدر نے دونوں مرتبہ اسے مسترد کردیا۔

امریکی ویب سائٹ ایکسیوس نے دعویٰ کیا ہے کہ امریکی صدر ڈونلڈ ٹرمپ نے سعودی ولی عہد محمد بن سلمان کی یمنی مجاہدین کے ٹھکانوں کو نشانہ بنانے کی 2 درخواستیں مسترد کردی ہیں۔

ایکسیوس کے مطابق محمد بن سلمان نے گزشتہ روز جمعرات کو امریکی صدر ڈونلڈ ٹرمپ سے 2 مرتبہ ٹیلی فون پر بات کی۔

رپورٹ کے مطابق سعودی ولی عہد نے ان دونوں گفتگو کے دوران امریکی صدر سے یمنی مجاہدین کے خلاف حملہ کرنے کی درخواست کی، تاہم ٹرمپ نے دونوں مرتبہ اس درخواست سے اتفاق نہیں کیا۔

اسی دوران امریکی سینٹ کام کے کمانڈر ایڈمرل بریڈ کوپر نے جمعرات کو ہنگامی رابطہ کاری اور مشاورت کے لیے سعودی دارالحکومت ریاض کا دورہ کیا۔

یہ پیش رفت ایسے وقت میں سامنے آئی ہے جب امریکی نیوز نیٹ ورک سی این این نے اس سے قبل سعودی امور سے باخبر ایک ذریعے کے حوالے سے انکشاف کیا تھا کہ سعودی عرب نے یمن پر حملے کے لیے اپنی جنگی منصوبہ بندی مکمل کرلی ہے اور اپنے اتحادیوں کو بھی ان منصوبوں سے آگاہ کردیا ہے۔

رپورٹ کے مطابق سعودی سفارت کاروں نے اگست میں امریکی سینیٹرز کو بتایا تھا کہ انصار اللہ کے ساتھ سیاسی رابطے کے تمام ذرائع ختم ہوچکے ہیں۔ سعودی حکام نے واشنگٹن سے ان حملوں کی حمایت کا مطالبہ بھی کیا ہے۔

رپورٹ میں مزید کہا گیا ہے کہ سعودی عرب ان دیگر ممالک کو بھی یمن کی جنگ میں شامل کرنے کی کوشش کررہا ہے جو ایران کے خلاف امریکہ کے ساتھ جنگ میں شامل ہونے کے حوالے سے تذبذب کا شکار تھے۔