شہداء کے جسموں کو پگھلانے والا صہیونی اسلحہ

1 دسمبر 2024

سچ خبریں:فلسطینی اسلامی مزاحمتی تحریک حماس نے اسرائیلی حکومت کی جانب سے ایسے غیر روایتی اسلحے کے استعمال کی بین الاقوامی سطح پر تحقیقات کے لیے کمیٹی تشکیل دینے کا مطالبہ کیا ہے، جو فلسطینی شہداء کے جسموں کو پگھلا دیتا ہے۔

الجزیرہ نیوز چینل کی رپورٹ کے مطابق، حماس نے ایک بیان میں کہا کہ غزہ کے شمالی علاقوں میں شہریوں اور ڈاکٹروں کی شہادتیں اس بات کا ثبوت ہیں کہ اسرائیلی فوج بے گناہ شہریوں پر حملوں کے دوران ایسے ہتھیار استعمال کر رہی ہے، جو شہداء کے جسموں کو مکمل طور پر پگھلا دیتے ہیں۔

یہ بھی پڑھیں: صیہونی درندے فلسطینی شہداء کے ساتھ کیا کر رہے ہیں؟ برطانوی میگزین کا انکشاف

رپورٹ میں یہ بھی کہا گیا کہ اسرائیلی فوج نے گزشتہ 53 دنوں کے دوران شمالی غزہ میں اپنے وحشیانہ اور وسیع پیمانے پر حملوں میں ممنوعہ اور غیر روایتی اسلحے کا استعمال کیا ہے۔

واضح رہے کہ حماس نے عالمی برادری سے مداخلت کی اپیل کی ہے تاکہ اس معاملے کی تحقیقات کی جا سکیں۔

حماس نے عالمی برادری اور اقوام متحدہ سے مطالبہ کیا کہ وہ ایک بین الاقوامی تحقیقات کمیٹی تشکیل دے، جو شمالی غزہ پہنچ کر اسرائیلی فوج کے استعمال کردہ اسلحے کی نوعیت اور اس کے ذریعے غیر جنگی افراد پر کیے گئے جرائم کا پتہ لگائے اور ان کو شناخت کرے۔

اسرائیلی محاصرے کی وجہ سے گزشتہ دو ماہ کے دوران شمالی غزہ میں کم از کم 3 ہزار فلسطینی شہید ہو چکے ہیں، جبکہ 10 ہزار سے زائد افراد زخمی ہوئے ہیں، جن میں تمام تر خواتین اور بچے شامل ہیں۔

غزہ کی وزارت صحت کے ڈائریکٹر منیر البرش نے پہلے ہی یہ اعلان کیا تھا کہ اسرائیلی فوج غزہ پر حملوں کے دوران غیر شناخت شدہ اسلحے کا استعمال کر رہی ہے، جس کے نتیجے میں شہداء کے جسم مکمل طور پر پگھل جاتے ہیں۔

غزہ کی سول ڈیفنس نے بھی ان اسلحوں کے استعمال کی تصدیق کی ہے اور کہا کہ ان ہتھیاروں نے ہزاروں فلسطینی شہداء کے جسموں کو پگھلا دیا ہے۔

غزہ کی سول ڈیفنس ایجنسی کے ڈائریکٹر جنرل محمد المغیر نے اس سے قبل اسرائیلی فوج کی جانب سے ان راکٹوں کے وسیع پیمانے پر استعمال کی اطلاع دی تھی۔

مزید پڑھیں: اسرائیلی فوج کے نئے جرم کے بارے میں صہیونیوں کے جھوٹ کا پردہ فاش

غزہ کی سول ڈیفنس نے اگست کے مہینے میں یہ اعلان کیا تھا کہ اس اسلحے کے استعمال کے نتیجے میں کم از کم 1760 فلسطینی شہداء کی لاشیں مکمل طور پر تباہ ہو چکی ہیں۔