ٹرمپ کی نظر میں یوکرینی صدر کی حیثیت

سچ خبریں:امریکہ کے صدر ڈونلڈ ٹرمپ نے اپنے بیان میں کہا کہ یوکرینی صدر زلنسکی ایک دکٹیٹر ہیں جو بغیر انتخابات کے اقتدار میں برقرار ہیں، اگر وہ فوری طور پر کچھ کریں گے نہیں تو ان کے لیے ملک باقی نہیں بچے گا۔

یہ بھی پڑھیں: روس یوکرین جنگ میں امریکی اتحادی کس کے ساتھ ہیں؟نیویارک ٹائمز کی رپورٹ

اسپوٹنک نیوز ایجنسی کی رپورٹ کے مطابق امریکہ کے صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشیل پر لکھا کہ یوکرین کے صدر زلنسکی ایک دکٹیٹر ہیں جو انتخابات کے بغیر اقتدار میں ہیں ، انہیں فوراً اقدام کرنے کی ضرورت ہے ورنہ ان کے لیے کوئی ملک نہیں بچے گا۔

ٹرمپ نے مزید کہا کہ زلنسکی نے امریکہ سے ۳۵۰ ارب ڈالر کی جنگی امداد وصول کی ہے لیکن اب تک انہیں کوئی بھی کامیابی حاصل نہیں ہوئی نیز ان میں سے 175 ارب ڈالر غائب ہو گئے ہیں۔

 ان کے مطابق یوکرین کی جنگ امریکہ کے بغیر کبھی حل نہیں ہو سکتی تھی، امریکہ نے یورپ سے 200 ارب ڈالر زیادہ خرچ کیے ہیں۔

یاد رہے کہ ٹرمپ نے قبل ازیں کہا تھا کہ یوکرین کو روس کے ساتھ جنگ شروع نہیں کرنی چاہیے تھی۔

انہوں نے یوکرین کے اس خدشے کو مسترد کیا کہ انہیں مذاکرات کے لیے مدعو نہیں کیا گیا، ٹرمپ کے مطابق زلنسکی کو تین سال پہلے روس کے ساتھ معاہدہ کر لینا چاہیے تھا۔

مزید پڑھیں: یوکرین جنگ سے پیسہ کمانے پر یورپی یونین کی امریکہ پر کڑی تنقید

ٹرمپ نے کہا کہ میں نے سنا ہے کہ وہ کہتے ہیں ‘ہمیں مدعو نہیں کیا گیا’؛ آپ کو تین سال پہلے یہ موقع ملا تھا ، آپ کو اس کا فائدہ اٹھانا چاہیے تھا، آپ کو جنگ شروع ہی نہیں کرنی چاہیے تھی، آپ اس وقت بھی معاہدہ کر سکتے تھے۔