فلسطینیوں نے صہیونی فلیگ مارچ کو روکنے کے لیئے اہم اعلان کردیا

?️ 15 جون 2021

غزہ (سچ خبریں) فلسطینیوں نے صہیونی فلیگ مارچ کو روکنے اور انتہاپسند یہودیوں کو قدس کی اہانت کرنے سے روکنے کے لیئے اہم اعلان کرتے ہوئے کہا ہے کہ وہ اس طرح کے انتہاپسندانہ مارچ کو قدس کے قریب نہیں آنے دیں گے۔

تفصیلات کے مطابق فلسطینی تحریک (پاپولر فرنٹ برائے لبریشن آف فلسطین) کے رہنما ماہر مظہر نے صہیونی مارچ کا مقابلہ کرنے کا مطالبہ کیا جسے "فلیگ مارچ” کہا جاتا ہے۔

سما نیوز ایجنسی نے مظہر کے حوالے سے نقل کیا ہے کہ ہم اس مارچ کے دوران بینیٹ اور صہیونی آبادکاروں کی انتہا پسند حکومت کو قدس کی سڑکوں تک نہیں جانے دیں گے اور انہیں اجازت نہیں دیں گے کہ مسجد اقصی کے صحن کی بے حرمتی کریں۔

انہوں نے مزید کہا کہ فلسطینی نیشنل اور اسلامی فورسز نے سب کو مل کر صیہونی آبادکاروں کا مقابلہ کرنے کی ضرورت پر زور دیا ہے۔

اس فلسطینی عہدیدار نے مغربی کنارے کے نوجوانوں سے صیہونیوں کے خلاف لڑنے کا مطالبہ کرتے ہوئے کہا ہے کہ اب وقت آچکا ہے کہ صہیونیوں سے اپنی زمین واپس لی جائے۔

مظہر نے مزید کہا کہ فلسطینی مزاحمت فلسطینی عوام کا دفاع کرے گی اور صیہونی حکومت کو اپنا جبر جاری رکھنے کی اجازت نہیں دے گی۔

فلسطینی عوام کے اتحاد اور صہیونیوں کے خلاف تل ابیب کو اپنی پالیسیوں سے دستبرداری کے لئے جدوجہد پر زور دیتے ہوئے انہوں نے زور دیا کہ غزہ کے تمام علاقوں میں بڑے مظاہرے کیے جائیں گے۔