پاکستان سمیت دنیا بھر میں ایرانی انقلاب کے بانی آیت اللہ خمینی کی برسی عقیدت و احترام سے منائی گئی

🗓️ 5 جون 2021

نئی دہلی (سچ خبریں) ایرانی انقلاب کے بانی آیت اللہ خمینی کی 32 ویں برسی کے موقع پر دنیا بھر میں عظیم الشان پروگرام منعقد ہوئے جن میں آیت اللہ خمینی کو زبردست خراج عقیدت پیش کرتے ہوئے انہیں دنیا بھر کے مظلوموں کا مددگار اور ظالموں سے نفرت کرنے والا عظیم رہنما قرار دیا گیا۔

غیر ملکی خبررساں ایجنسی کی رپورٹ کے مطابق بھارت، پاکستان اور کشمیر سمیت دنیا کے مختلف ممالک میں ایرانی انقلاب کے بانی آیت اللہ خمینی کی 32 ویں برسی عقیدت و احترام کے ساتھ منائی گئی اور انہیں زبردست خراج عقیدت پیش کیا گیا۔

موصولہ اطلاعات کے مطابق پاکستان کے شہر راولپنڈی سمیت مختلف شہروں میں پاکستانی عوام نے مسلمانوں کو بیدار کرنے کے سلسلے میں آیت اللہ خمینی کو خراج عقیدت پیش کیا۔

ادھر بھارت کے شہر لکھنؤ سمیت کئي شہرون میں آن لائن پروگرام منعقد کئے گئے جن میں مختلف دانشوروں نے سامراجی طاقتوں کے خلاف آیت اللہ خمینی کے اقدامات کی تعریف کرتے ہوئے کہا کہ آیت اللہ خمینی نے دنیا کو اسلامیت اور جمہوریت کی ایک نئی فکر اور نیا نظریہ عطا کیا اور انہوں نے ثابت کردیا کہ عالمی مشکلات کا اصلی حل اسلام اور عوام کے ہاتھ میں ہے۔

دوسری جانب مقبوضہ کشمیر، عراق، شام، لبنان، فلسطین، ترکی اور یورپی ممالک میں بھی آیت اللہ خمینی کی 32 ویں برسی کے موقع پر اجتماعات اور سمینار منعقد ہوئے اور حاضرین نے آیت اللہ خمینی کی خدمات پر انہیں زبردست خراج تحسین اور خراج عقیدت پیش کیا۔

حاضرین نے آیت اللہ خمینی کو ایک عظیم رہنما قرار دیتے ہوئے کہا کہ اس عظیم قائد کی ہیبت آج بھی طاغوت و استعمار کے ایوانوں میں لرزہ پیدا کر دیتی ہیں، آیت اللہ خمینی ایسی بابصیرت اور حکیمانہ شخصیت کے مالک تھے جنہوں نے دوستی کے لبادے میں چھپے ہوئے اسلام دشمنوں کے چہروں کو سب کے سامنے بے نقاب کیا، وہ عالم اسلام کے دشمن امریکہ، اسرائیل اور ان کے حواریوں کی شرانگیزیوں کے خلاف آخری دم تک ڈٹے رہے۔