غزہ میں صیہونی مظالم پر خاموشی ناقابل قبول:سوئٹزرلینڈ کے سابق سفارتکار

سچ خبریں:سوئٹزرلینڈ کے 56 سابق سینئر سفارتکاروں نے اپنی حکومت کے اسرائیل کے خلاف نرم رویے اور غزہ میں جاری مظالم پر خاموشی کو سخت تنقید کا نشانہ بنایا ہے۔

 المیادین نیوز چینل کی رپورٹ کے مطابق سوئٹزرلینڈ کے 56 سابق سینئر سفارتکاروں نے اس ملک وزیر خارجہ ایگنازیو کاسیس کو ایک مشترکہ خط میں خبردار کیا ہے کہ موجودہ پالیسی سوئٹزرلینڈ کی غیرجانبدارانہ بین الاقوامی حیثیت اور انسانی حقوق کے اصولوں کے خلاف ہے۔

یہ بھی پڑھیں:سوئٹزرلینڈ میں فلسطینی شہریوں کے بارے میں اقوام متحدہ کی کانفرنس 

ان سابق سفارتکاروں نے مطالبہ کیا کہ سوئٹزرلینڈ حکومت فوری طور پر اسرائیلی منصوبے کی مخالفت کرے، جس کے تحت غزہ کے شہریوں کو جبراً بے دخل کر کے اس علاقے پر دوبارہ مکمل قبضہ کرنے کی سازش جاری ہے۔

ان کا کہنا ہے کہ اسرائیل نسل کشی، جبری نقل مکانی اور منظم طریقے سے فلسطینیوں کے خلاف جنگی جرائم میں ملوث ہے، جس پر عالمی برادری کی خاموشی تشویش ناک ہے۔

سفارتکاروں نے اس بات پر بھی زور دیا کہ سوئٹزرلینڈ کو امریکہ کی زیر نگرانی قائم ہونے والے نام نہاد "نئے انسانی امدادی ادارے” سے بھی علیحدگی اختیار کرنی چاہیے، کیونکہ یہ ادارہ نہ صرف انسانی ہمدردی کے اصولوں سے انحراف کر رہا ہے بلکہ اسرائیلی پالیسیوں کو بالواسطہ طور پر سہولت فراہم کر رہا ہے۔

انہوں نے کہا کہ سوئٹزرلینڈ کی عالمی شناخت، جو کہ انسانی حقوق، غیرجانبداری اور انصاف پر مبنی ہے، اسرائیل سے اس چشم پوشی کے باعث داؤ پر لگ چکی ہے۔

مزید پڑھیں:ہم سب غزہ کے ہیں؛سوئٹزرلینڈ کے عوام

یہ سفارتکار، جو کئی عشروں تک مختلف بین الاقوامی فورمز پر سوئٹزرلینڈ کی نمائندگی کر چکے ہیں، اب اپنی حکومت سے مطالبہ کر رہے ہیں کہ وہ نہ صرف غزہ میں ہونے والی انسانی تباہی کو تسلیم کرے بلکہ اس کے خلاف عملی اقدامات بھی کرے۔