مغربی کنارے میں صہیونی حملوں میں شدت، بڑے پیمانے پر فلسطینی گرفتار

?️ 2 ستمبر 2026

سچ خبریں:مغربی کنارے کے مختلف علاقوں میں صہیونی فوج اور آبادکاروں کے حملے جاری ہیں۔ متعدد فلسطینی گرفتار، گھروں کی تلاشی، گاڑیاں نذر آتش اور املاک ضبط کی گئیں، جبکہ صیہونی فوج نے خطے میں بڑے تصادم کے خطرے سے خبردار کیا ہے۔

مغربی کنارے میں صہیونی قابض فوج کی جارحیت میں نمایاں اضافے کے درمیان فلسطینی ذرائع نے بتایا ہے کہ بدھ کے روز بھی خطے کے مختلف علاقوں میں صہیونی فوج نے بڑے پیمانے پر چھاپہ مار کارروائیاں کرتے ہوئے متعدد فلسطینیوں کو گرفتار کیا۔

فلسطینی مقامی ذرائع کے مطابق بدھ کے روز صہیونی قابض فوج نے مغربی کنارے کے کئی علاقوں میں دھاوے بولے اور متعدد فلسطینیوں کو حراست میں لے لیا۔

دوسری جانب صہیونی آبادکاروں نے بھی گزشتہ روز کی طرح مختلف علاقوں میں حملے جاری رکھے۔ انہوں نے نابلس کے جنوب میں واقع شہر بیتا میں فلسطینیوں کی گاڑیوں کو آگ لگا کر اپنی کارروائیاں مزید تیز کردیں۔

مغربی کنارے کے شمال میں واقع طوباس میں قابض فوج نے فلسطینیوں کے گھروں پر چھاپے مارنے کے بعد شہر کے شمال میں واقع عقبہ سے 2 نوجوانوں کو گرفتار کرلیا۔

نابلس میں قابض فوج نے شہر کے مشرق میں واقع بلاطہ پناہ گزین کیمپ پر دھاوے کے دوران 6 فلسطینیوں کو گرفتار کیا۔

صہیونی فوجیوں نے نابلس میں ایک دھات کاری کی ورکشاپ پر بھی چھاپہ مارا اور اس کا سامان ضبط کرلیا۔ اس کے بعد ورکشاپ کے مالک کے گھر پر حملہ کرکے 3 نوجوانوں کو گرفتار کرلیا گیا۔

مغربی کنارے کے جنوب میں بیت لحم کے علاقے میں صہیونی قابض فوج نے مشرقی بیت لحم کے راشیدہ گاؤں سے 4 فلسطینیوں کو گرفتار کرکے تفتیش کی۔

فلسطینی سکیورٹی ذرائع نے بتایا کہ صہیونی فوجیوں نے گاؤں پر حملہ کرکے کئی گھروں میں داخل ہوکر تلاشی لی اور متعدد نوجوانوں کو ان کے گھروں سے گرفتار کرلیا۔

نابلس کے جنوب میں قابض صیہونی فوج نے السویہ گاؤں کی کونسل کی ملکیت ایک ٹریکٹر بھی ضبط کرلیا۔

مغربی کنارے کے شمال میں طولکرم کے علاقے میں بھی صہیونی فوجیوں نے بدھ کی صبح شہر کے مشرق میں واقع بیت لید پر دھاوا بولا اور شہر کی سڑکوں اور محلوں میں بڑی تعداد میں فوجی گاڑیاں اور اہلکار تعینات کردیے۔

مقامی ذرائع کے مطابق بڑی تعداد میں صیہونی فوجی گاڑیاں شہر میں داخل ہوئیں اور سڑکوں اور محلوں میں گشت کیا۔ اسی دوران صہیونی قابض فوجیوں نے فلسطینیوں کے گھروں اور باغات کے درمیان مورچے قائم کرکے فائرنگ شروع کردی۔

ذرائع نے مزید بتایا کہ قابض فوج نے متعدد گھروں پر حملہ کرکے ان کی تلاشی لی۔

اسی دوران صہیونی آبادکاروں نے بدھ کی صبح نابلس کے جنوب میں واقع شہر بیتا میں 2 گاڑیوں کو آگ لگا دی۔ مقامی ذرائع کے مطابق آبادکاروں کے ایک گروہ نے شہر کے مشرقی حصے پر حملہ کیا اور رہائشیوں کے گھروں کے سامنے کھڑی 2 گاڑیوں کو نذر آتش کردیا۔

یہ کارروائیاں ایسے وقت میں جاری ہیں جب مغربی کنارے میں صہیونی آبادکاروں کے حملوں میں مسلسل اضافہ ہورہا ہے۔ گزشتہ ماہ آبادکاروں کے 628 حملے ریکارڈ کیے گئے، جن میں رام اللہ اور البیرہ میں 157، نابلس میں 137، الخلیل میں 120، بیت لحم میں 73، طوباس میں 40، جنین میں 36 اور بیت المقدس میں 31 حملے شامل ہیں۔

چند روز قبل عبرانی اخبار اسرائیل ہیوم نے بتایا تھا کہ صیہونی فوج نے ایک اسٹریٹجک انتباہ جاری کرتے ہوئے کہا ہے کہ بڑھتی ہوئی کشیدگی اور متعلقہ حکام کی صورتحال سے نمٹنے میں ناکامی کے باعث مغربی کنارے کو بڑے پیمانے پر تصادم کے خطرے کا سامنا ہے۔

صہیونی فوجی تجزیہ کار یوآف لیمور، جنہوں نے اس معاملے کا انکشاف کیا، نے کہا کہ صیہونی فوج کا یہ انتباہ منظر عام پر نہیں لایا گیا اور اسرائیل کاٹز، جو اس وقت وزیر جنگ ہیں، نے صرف ایک مختصر اور مبہم بیان جاری کیا۔ تاہم فوج کے ایک اجلاس میں آبادکاروں کے تشدد یا مغربی کنارے میں یہودی دہشت گردی کے نام سے موسوم کارروائیوں کے اعداد و شمار کا جائزہ لیا گیا، جن سے اس علاقے میں تشدد میں شدید اضافے کا پتا چلتا ہے۔

انہوں نے مزید کہا کہ صیہونی فوج نے مغربی کنارے میں صورتحال پر کنٹرول کھونے کے خطرے سے خبردار کیا ہے۔ فوج کے اعلیٰ حکام، جن میں چیف آف اسٹاف، سینٹرل کمانڈ کے سربراہ اور آپریشنز ڈویژن کے سربراہ سمیت دیگر عہدیدار شامل ہیں، تسلیم کرتے ہیں کہ یہودی دہشت گردی مغربی کنارے میں صورتحال کو مزید سنگین بنانے والا ایک اہم عنصر ہے۔