وائٹ ہاؤس کی ایران کو دھمکی

?️ 5 جون 2025

سچ خبریں:وائٹ ہاؤس کی ترجمان نے دعویٰ کیا ہے کہ اگر ایران نے ٹرمپ کے خصوصی ایلچی ویٹکاف کی جوہری تجویز کو قبول نہ کیا، تو تہران کو سخت نتائج کا سامنا کرنا پڑے گا،ساتھ ہی یوکرین تنازع اور روس پر پابندیوں کے امکانات پر بھی گفتگو کی گئی۔

الجزیرہ نیوز چینل کی رپورٹ کے مطابق، وائٹ ہاؤس کی ترجمان کارولین لویت نے منگل کے روز ایک پریس کانفرنس کے دوران دعویٰ کیا کہ اگر ایران نے امریکی خصوصی ایلچی استیو ویٹکاف کی جانب سے دی گئی مفصل جوہری تجویز کو رد کیا، تو اسے "سنگین نتائج” کا سامنا کرنا پڑے گا۔

یہ بھی پڑھیں:ایران پر دباؤ ڈالنے سے ایٹمی مسئلہ حل نہیں ہو گا: پکن

کارولین لویت نے کہا کہ اسٹیو ویٹکاف، جو مغربی ایشیا کے لیے صدر ٹرمپ کے خصوصی ایلچی ہیں، نے ایران کو ایک تفصیلی تجویز بھیجی ہے جس کا تعلق جوہری معاہدے سے ہے، اور صدر ٹرمپ کو امید ہے کہ ایران اس تجویز کو قبول کرے گا۔

ترجمان نے مزید کہا کہ اگر ایران نے اس تجویز کو تسلیم نہ کیا توتہران کو سنجیدہ اور سنگین نتائج کا سامنا کرنا ہوگا۔

یہ بیان ایسے وقت میں سامنے آیا ہے جب امریکہ اور ایران کے درمیان جوہری مذاکرات ایک بار پھر توجہ کا مرکز بنے ہوئے ہیں، اور ایران کی جانب سے اندرونِ ملک یورینیم کی افزودگی جاری رکھنے کے موقف پر بین الاقوامی سطح پر بحث جاری ہے۔

کارولین لویٹ نے یوکرین کے حوالے سے بھی گفتگو کرتے ہوئے کہا کہ یوکرین سے متعلق مذاکرات میں ہم نے نمایاں پیش رفت کی ہے، لیکن اگر ضرورت پڑی تو صدر ٹرمپ روس پر پابندیاں عائد کرنے کے لیے بھی تیار ہیں۔

انہوں نے مزید کہا کہ ہم تجارت کے حوالے سے بھی اچھے معاہدوں کے قریب پہنچ چکے ہیں، اور صدر ٹرمپ یوکرین میں جنگ ختم کرنے کی موجودہ کوششوں پر خوش بین ہیں۔

مزید پڑھیں:ایران-امریکہ تعلقات اور دفاعی و مزاحمتی آپشنز  

ایک سوال کے جواب میں لویت نے کہا کہ صدر ٹرمپ کو یوکرین کی جانب سے حالیہ ڈرون حملے کی پیشگی اطلاع نہیں تھی نیز انہوں نے اعلان کیا کہ ٹرمپ آئندہ نیٹو اجلاس میں شرکت کریں گے۔